Кенияда намойишчиларга қарши резина ўқлар ишлатилди

Кенияда солиқни ошириш қонуни бекор қилинганига қарамай, норозилик намойишлари давом этмоқда. 20 дан ортиқ одамнинг ўлимига сабаб бўлган тўқнашувлардан сўнг ҳукумат мухолифлари 27 июн, пайшанба куни пойтахт Найроби, мамлакат жануби-шарқидаги Момбаса ва жануби-ғарбий қисмидаги Кисуму шаҳарларида яна кўчага чиқди.

Кенияда норозилик намойишлари ҳукуматнинг солиқларни, жумладан, озиқ-овқатга солиқларни ошириш нияти фонида бошланди. 25 июн куни юзлаб одамлар Найробидаги парламент биносига бостириб кирганида намойишлар зўравонликка айланиб кетган эди. Найроби губернатори идорасида ёнғин чиқди. Полиция намойишчиларга қарата ўқотар қуроллардан ўқ узди. Кения Инсон ҳуқуқлари бўйича комиссиясига кўра, натижада 22 киши ҳалок бўлган.

Кения президенти Уилям Руто кеча солиқларни оширишдан бош тортганини эълон қилди, аммо ташкилотчилар ўз тарафдорларини намойишларни давом эттиришга чақирди.

Кенияда қашшоқлик ортиб бормоқда

Кенияликлар аллақачон мамлакатда яшаш нархининг жуда юқорилигидан азият чекмоқда. Ҳукумат солиқларни ошириш заруратини юқори давлат қарзи ва давлатга фаолият учун янги асослар бериш билан изоҳлади.

Июн ойи ўрталарида ҳукумат намойишчиларнинг босими остида режалаштирилган солиқларни ошириш бўйича жараён асосий қисмини бекор қилган эди, аммо бу намойишчиларни тинчлантирмади.