“Қайси вазирлик керак-керакмаслиги аския билан ҳал қилинмайди” — Шерзодхон Қудратхўжа

Ректор Шерзодхон Қудратхўжанинг таъкидлашича, Ўзбекистонга қайси вазирлик керак ёки керак эмаслиги доим долзарб бўлиб келган.

“Менимча, йигитлар аския қилишди. Ҳазиллашишган бўлишса керак, кайфиятлари яхши эди. Йигитларга озгина қаҳва етишмади – унинг қолдиқларига қараб фол очиш учун...

Ўзбекистонга қайси вазирлик керак, қайси керак эмаслиги – бу жуда долзарб масала. Бундай ҳазил, аския билан ёндашиб бўлмайди. Биласизми, идеалистлар бўлади, олимлар бўлади, уларнинг назарида ҳаёт бошқача бўлади. Лекин, реализм ва реал вазият бор. Ўзбекистон, эътибор берсангиз, геосиёсий жиҳатдан жуда мураккаб ҳудудда жойлашган. Ҳар куни бир таҳдид, ҳар куни бир хавф. Ҳар куни минглаб масалалар пайдо бўлади. Уни тезкор ҳал қилиб, шуғулланадиган ташкилотлар керак.

Майли, айтайлик, бизга Қишлоқ хўжалиги вазирлиги керак эмасдир, лекин ҳамма қўшниларимизда бор-ку. Молларнинг кириб-чиқиши, ветеринария, чорвачилик, сертификат, карантин масалалари бор, булар билан ким шуғулланади?” – дейди Шерзодхон Қудратхўжа.

У Ўзбекистон денгизга икки мамлакат ҳудудини босиб ўтиб чиқадиган иккита давлатдан бири эканини таъкидлар экан, турли инқирозли вазиятларда вазирлик ва идоралар эрта-ю кеч муаммоларни ҳал этиш билан шуғулланишини қайд этди.

“Бундай масалаларни кимдир ҳал қилмаса, деярли қирқ миллионга яқин аҳоли учун кучли зарбалар бўлади. Ўзим ҳукуматда ишлаганман, ҳукумат иши нима эканлигини кўчадан эшитган одам эмасман. Шунинг учун бу ҳазиллашадиган масала эмас. Давлатимиз ҳам бюджет пулини совуришдан манфаатдор эмас”, – дейди ЎзЖОКУ ректори.