Кенияда Париж олимпиадасида иштирок этган марафончи севган йигити томонидан ёқиб юборилди

Парижда ўтказилган олимпиада ўйинларида аёллар марафони финалида иштирок этган угандалик спортчи Ребекка Чептегеи йигит устига бензин сепиб, ёқиб юборганидан уч кун ўтиб, шифохонада вафот этди. Бу ҳақда республика Енгил атлетика федерацияси хабар берди.

Спортчининг севган йигити Динсон Ндиема 1 сентябр куни унинг Кениядаги уйига канистрда бензин кўтарган ҳолда бостириб кирган. CNN’нинг ёзишича, ўзаро можарога «ер борасидаги келишмовчилик» сабаб бўлган.

Чептегеи танасининг 75 фоиз қисми куйиши билан оғир аҳволда шифохонага ётқизилган. Шунингдек, Ндиема ҳам куйиш жароҳати билан шифохонага олиб келинган, шифокорларнинг сўзларига кўра, унинг аҳволи «яхши ва барқарорлашмоқда».

Уганда федерацияси Чептегеи оиладаги зўравонлик қурбони бўлганини айтмоқда. Федерация бундай ҳаракатларни қоралаб, адолат ўрнатилишини талаб қилди. Уганда Олимпия қўмитаси раҳбари Доналд Рукаре Чептегеига уюштирилган ҳужумни «буюк спортчининг ўлимига олиб келган қўрқоқ ва бемаъни ҳаракат», деб атади.

33 ёш Чептегеи олимпиада марафонида қатнашиб, финишга 44-бўлиб етиб келганди. Reuters агентлигининг ёзишича, Чептегеи 2021 йил октябрдан бери Кенияда ўлдирилган учинчи спортчи. Олдинги икки ҳолатда ҳам қотилликда гумонланганлар спортчиларнинг таниши бўлган.

Ҳукумат томонидан эълон қилинган маълумотларга кўра, 2022 йилда Кенияда 15 ёшдан 49 ёшгача бўлган аёл ва қизларнинг 34 фоизи жисмоний зўравонликка учраган.