Пентагон Нигердан АҚШ кучларини олиб чиқишни якунлади

АҚШ Мудофаа вазирлиги ва Нигер Миллий мудофаа вазирлиги АҚШ кучлари ва воситаларини Нигердан олиб чиқиб кетиш жараёни тугаганини эълон қилди. Бу ҳақда 16 сентябр, душанба куни АҚШнинг Африкадаги қўмондонлиги (AFRICOM) маълумот берди.

Жараён шартлар бўйича ўзаро келишувга эришилгандан сўнг 19 майда бошланган ва 7 июлда Ниамейдаги 101-ҳаво базаси ва 5 августда Агадесдаги 201-ҳаво базасидан олиб чиқиш билан давом этган. Икки юлдузли генерал ва ходимлардан иборат AFRICOM мувофиқлаштириш элементи ҳам мамлакатдан олиб чиқиб кетилди. «АҚШ ва Нигер ҳарбийлари ўртасидаги самарали ҳамкорлик ва алоқа қўшинларнинг хавфсиз, тартибли ва масъулиятли олиб чиқилишини таъминлади, бу ўзаро келишилган 15 сентябр санасига қадар якунланди», — деб хабар берди Пентагон.

Нигер қўшинларини ўқитиш

АҚШ кучлари узоқ вақтдан бери Нигер қўшинларини ўқитиб келган ва минтақада ИШИД ҳамда «Ал-Қоида»га қарши шериклар бошчилигидаги аксилтеррор миссияларини қўллаб-қувватлаган.

Америка ҳарбий контингентини олиб чиқиш бўйича келишувга апрел ойи охирида АҚШ давлат котиби ўринбосари Курт Кэмпбелл ва Нигер бош вазири Али Ламин Зейннинг Вашингтондаги учрашувида эришилган эди. Май ойи бошида россиялик ҳарбийлар Нигер пойтахти Ниамейдаги Америка ҳаво базасига киргани маълум бўлди. Бироқ, АҚШ мудофаа вазири Ллойд Остиннинг таъкидлашича, руслар ўша пайтда базада жойлашган АҚШ қўшинлари ва ҳарбий техникасидан фойдалана олмаган.

Нигердаги давлат тўнтаришидан кейин Вашингтон билан ҳарбий ҳамкорлик тўхтатилди

Нигер дунёдаги энг қашшоқ мамлакатлардан биридир. 2023 йил июл ойида ҳарбий хунта мамлакатда ҳокимиятни эгаллаб олди. Март ойида исёнчилар Вашингтон билан ҳарбий ҳамкорлик шартномасини бузди. Москва алоқадорликда гумон қилинаётган давлат тўнтаришидан олдин Нигер АҚШ, Франция ва Германия каби Ғарб давлатларининг Ғарбий ва Марказий Африкада гуруҳларга қарши курашдаги асосий шерикларидан бири бўлган. 2023 йил октябр ойида Франция ўз қўшинларини Ғарбий Африка мамлакатидан олиб чиқиб кетишни бошлади, жараён декабргача якунланди. Бундесвер 2024 йил августида худди шундай қилди.

Reuters агентлигига кўра, Вашингтон Ғарбий Африкада «Б»режасини изламоқда, бироқ жараён суст ва экстремистик гуруҳлар фаоллиги тез ўсиб бораётгани ҳақида минтақадан хабарлар келяпти.