Германиянинг Москвадаги элчиси РФ ТИВга чақирилди

Россия Ташқи ишлар вазирлиги Германиянинг Москвадаги элчиси Александр Ламбсдорфни чақиртирди, унга Шарқий Германиянинг Росток шаҳрида Берлин ташаббуси билан ГФР ҲДК штаби негизида НАТО денгиз қўмондонлигининг минтақавий штаби ташкил этилгани муносабати билан кескин норозилик билдирилди. Бу ҳақда 22 октябр куни Россия ТИВ  сайтида чоп этилган хабарда айтилади.

«Элчига Германия ҳукмрон доираларининг бу қадами Иккинчи жаҳон уруши натижаларини кескин қайта кўриб чиқиш ва мамлакатни ҳарбийлаштириш йўлининг давоми эканлиги айтилди. 1990 йил 12 сентябрдаги Германияга нисбатан якуний келишув тўғрисидаги шартнома («2+4 шартномаси»)нинг 5-моддаси 3-банди қоидалари қўпол равишда бузилган. Уларда собиқ ГДР ҳудудида хорижий қўшинларнинг жойлаштирилишига йўл қўймаслик мажбурияти бор эди», — дейилади баёнотда.

Ташқи ишлар вазирлиги Москва Берлиндан «зудлик билан ва кенг қамровли тушунтириш» талаб қилганини таъкидлади.

«Россия томони нафақат Европа пойтахтларидаги сиёсатчилар, балки уларнинг Вашингтондаги кураторлари ҳам Европа ва Германия учун СССРга кўр-кўрона нафрат билан йўғрилган Париж ва Лондоннинг учинчи рейх раҳбарияти ҳаракатларига жимгина розилиги қандай офат келтирганини унутиб, тарихий амнезияга чалинганини таъкидлади», дея қайд этди Ташқи ишлар вазирлиги.