Ўзбекистонлик давлат хизматчилари Оксфордда малака ошириши мумкин

Ўзбекистоннинг юқори салоҳиятли давлат хизматчилари Буюк Британиянинг Оксфорд университетидаги Said Business School мактабида малака оширишга таклиф этилиши мумкин. Бу ҳақда Ўзбекистон президентининг иқтисодий ривожланиш, самарали бошқарув ва халқаро ҳамкорлик масалалари бўйича маслаҳатчиси Сума Чакрабарти маълум қилди.

Чакрабарти LinkedIn ижтимоий тармоғига жойлаган постида Ўзбекистон президентининг махсус топшириқлар бўйича маслаҳатчиси Сардор Умрзоқов билан Тошкентда учрашганини айтиб, биргаликда тушган суратини илова қилди.

Учрашувда улар давлат хизматчиларининг иш самарадорлигини ошириш бўйича фикр алмашган. Умрзоқов ходимлар тўлиқ иш соатига амал қилиши тарафдори эканини айтган. Унга кўра, агар вазирликлар ходимлари мунтазам иш соатлари бўйича ишласа ва оилалари билан бугунгидан кўпроқ вақт ўтказиш имкониятига эга бўлса, бу иш самарадорлигига ижобий таъсир кўрсатади.

“Мен бу фикрни тўлиқ қўллаб-қувватлайман, чунки ўтмишда Буюк Британия давлат хизмати тизимида энг юқори даражаларда мослашувчан иш тартибини жорий қилиш тажрибасига эга бўлганман”, – деган Сума Чакрабарти.

Умрзоқов ва Чакрабарти Ўзбекистоннинг Жаҳон савдо ташкилотига аъзо бўлиши бўйича ютуқлар ҳамда мамлакатга тўғридан тўғри хорижий инвестицияларни жалб қилиш бўйича янги дастурни бошлаш мавзуларини ҳам муҳокама қилган.