Қаршидаги фожианинг газ ёки ис гази билан боғлиқлиги эҳтимолдан йироқ — “Ҳудудгазтаъминот”

Қарши шаҳрида бир оиланинг 4 аъзоси ўзлари яшаб келган уйда ҳалок бўлгани газ ёки ис гази билан боғлиқлиги эҳтимолдан йироқ, дея маълум қилди “Ҳудудгазтаъминот”. Компанияга кўра, воқеа жойини текширган газ таъминоти ва фавқулодда вазиятлар идоралари шундай хулосага келган. Аввалроқ прокуратура мўрилар уланган жойдан ис гази чиққанини маълум қилганди.

Фото: "Ҳудудгазтаъминот" АЖ

17 декабр куни Қарши шаҳрида 46 ёшли эркак ва унинг уч фарзанди ўзлари яшаб келган хонадонда жонсиз ҳолда топилди. Бош прокуратура матбуот хизматига кўра, ҳодисага ис гази сабаб бўлган. Аммо “Ҳудудгазтаъминот” бу версияга қўшилмаслигини маълум қилди.

Компания матбуот хизматининг Kun.uz'га маълум қилишича, воқеа жойини текширган ФВБ ва газ таъминоти масъуллари газ билан боғлиқ муаммо йўқлигини аниқлаган.

“Мутасадди ходимлар иштирокида текширилганда ер тўлада ўрнатилган 2 дона иситиш қозонларининг дудбуронларини бир-бирига боғланиш жойи очиқ ҳолатда экани, хонадоннинг ер тўласида жойлашган иситиш қозонининг ишлаш жараёни текширилиб кўрилганда, табиий газ босими бир меъёрда экани, газоанализатор билан кўрилганда хонада газ сизиб чиқиши ҳолатлари йўқлиги, дудбуроннинг тортиш кучини гугурт ёрдамида текширилганда тортиш кучи борлиги аниқланди.

Юқоридаги ҳолатлар, мазкур бахтсиз ҳодиса газ ёки ис гази билан боғлиқлиги эҳтимолдан йироқлигини кўрсатмоқда”, – дейилади “Ҳудудгазтаъминот” АЖ ахборотида.

Қўшимча қилинишича, бахтсиз ҳодиса сабаблари прокуратура, ички ишлар, фавқулодда вазиятлар ва бошқа тегишли мутасадди ташкилотлар томонидан ўрганилмоқда. Экспертиза хулосаларига кўра, қўшимча маълумот берилади.

Эслатиб ўтамиз, прокуратура илгари сурган версияга кўра, уй ертўласида ўрнатилган замонавий икки контурли иситиш қозони мўрисининг умумий вентиляция мўрисига уланган қисмидан ис гази чиққан.

Ҳодиса оқибатида 46 ёшли эркак ва унинг 18, 16 ва 10 ёшда бўлган уч фарзанди ҳалок бўлди.

#ис гази #Ҳудудгазтаъминот #Қарши шаҳри