Туркия ТИВ раҳбари Сурияга қарши санкцияларни тезроқ бекор қилишга чақирди

Туркия ташқи ишлар вазири Ҳоқон Фидан Суриянинг қайта тикланишига ёрдам кўрсатиш учун халқаро ҳамжамият ундан санкцияларни олиб ташлаши кераклигини маълум қилди.

«Олдинги режимга қарши жорий этилган санкцияларни имкон қадар тезроқ олиб ташланши керак», — дейди Фидан Суриянинг янги раҳбари Аҳмад ал-Шаръа билан ўтказилган матбуот анжуманида.

«Халқаро ҳамжамият Сурия оёққа туриши ва кўчиб кетган инсонлар ортга қайтишида ёрдам бериш учун кучларини сафарбар қилишлари керак», — дея қўшимча қилади Туркия вазири.

Фидан, шунингдек, Суриядаги ҳозирги вазиятдан фойдаланиб, мамлакат ҳудудида ўз назоратини ўрнатишга уринаётган Исроилни қоради.

Туркия президенти Ражаб Тоййиб Эрдўған бир неча кун олдин Туркия курд гуруҳларида кўраётган таҳдидни бартараф этиш учун Анқара Сурия шимолидаги вазиятга тўғридан-тўғри аралашиши мумкинлигини айтганди. Унинг сўзларига кўра, Сурия билан чегарада хавфсизликни таъминлаш Курдистон ишчилар партияси (КИП) томонидан янги жангчилар ёлланишининг олдини олишга ҳам ёрдам беради.

Аввалроқ АҚШ Суриянинг амалдаги раҳбари Аҳмад ал-Шаръани ҳибсга олишда ёрдам кўрсатганлик учун 10 миллион доллар миқдоридаги мукофот бериш таклифини қайтариб олгани маълум бўлди. Ўз навбатида Аҳмад ал-Шаръа BBC учун интервьюсида мамлакат урушлар натижасида ҳолдан тойгани ва энди ўз қўшнилари ёки Ғарбга хавф туғдирмаслигини билдирди.