Тошкент метросининг 12 та бекатида йўл ҳақини кафт орқали тўлаш имконияти яратилди

Тошкент метросида «MyID Palm» кафт расми бўйича тўлов тизими ишга туширилди. Бу ҳақда «Uzinfocom» Spot’га маълум қилган.

Йўловчини биометрик идентификация қилиш учун кафтдаги томирлар ҳосил қилган расмни сканерлаш технологияси қўлланади. Тизим маҳаллий ишлаб чиқувчилар томонидан Транспорт вазирлиги, «АТТО» транспорти тўлов хизмати ва «Octobank» билан ҳамкорликда яратилган.

Ишлаб чиқувчилар фойдаланувчи маълумотларини ишончли ҳимоя қилишга ваъда беряпти. Технология рухсатсиз кириш ва биометрик профилларни сохталаштиришга йўл қўймайди, дея таъкидланади хабарда.

«MyID Palm» сканерлари Чилонзор йўлининг «Олмазор»дан «Буюк ипак йўли»гача бўлган 12 та ерости станциясида синов режимида ишлаяпти. Яқин вақт ичида тизим қамрови барча станцияларга кенгайтирилиши режалаштирилган.

Тизимдан «АТТО» транспорт картаси ва ўрнатилган сервис иловаси бўлган смартфон мавжудлигида фойдаланиш мумкин. Бунинг учун биометрик профил яратиш ва улар мавжуд бўлган метро бекатларидан биридаги инфокиоскда кафтларни сканерлаш талаб этилади.

Маълумот учун, кафт орқали тўлов тизимини дастлабки синовдан ўтказиш 2023 йилнинг ноябр ойи охирида бошланганди. Ўшанда тизим «Халқлар дўстлиги» метро бекатида ўрнатилганди.