«Сити» қайтмоқда, «Арсенал» «Ливерпул»ни хурсанд қилди. Кун ўйинлари

Англия: Гвардиола барибир норози

«Тоттенҳэм» – «Нюкасл» 1:2
Голлар: 1:0 – 4 Соланке, 1:1 – 6 Гордон, 1:2 – 38 Исак.
«Тоттенҳэм» – Остин, Спенс, Грэй, Дрэгушин (Регилон, 46), Порро, Сарр (Биссума, 62), Бергвалл (Мэддисон, 62), Вернер (Сон Ҳён Мин, 62), Кулусевски, Жонсон, Соланке.
«Нюкасл» – Дубравка, Ҳолл, Берн, Ботман (Келли, 90+2), Ливраменто, Жоэлинтон, Тонали, Бруно Гимараэс, Гордон (Барнс, 78), Мерфи (Лонгстафф, 86), Исак (Уиллок, 86).
Огоҳлантиришлар: Берн (17), Жоэлинтон (73), Ботман (80), Исак (86), Регилон (90+9).

Ўтган йилда «Тоттенҳэм» АПЛ ўйинларида биринчи бўлиб гол ўтказишни канда қилмади. 2025 йилни эса «шпорлар» тезкор гол уриш билан бошлади, аммо жамоада қайта туғилиш рўй бермади. Соланкенинг зарбасидан икки дақиқа ўтиб Гордон ҳисобни тенглаштирди, бўлим охирида эса «Нюкасл»нинг асосий тўпурари Исак катта саҳнага чиқди. Швед ҳужумчиси аввалига ўта қулай вазиятдан фойдалана олмади, аммо иккинчи уринишда қаторасига саккизинчи ўйиндаги голини нишонлади. «Қарғалар» тарихида бундай серияга фақат икки футболчи — афсонавий Алан Ширер (1996) ва Жо Уиллок (2021) эришган.

«Тоттенҳэм» ҳимоясидаги муаммолар ҳеч қаерга йўқолмаганди. Ромеро, ван де Вен, Дэвис ва Удоджи ҳамон жароҳатда. Иккинчи голдаги асосий айбдор Дрэгушин танаффусдаёқ алмаштириб ташланди, Ангелос Постекоглу ҳимоя марказига — 18 ёшли номинал таянч ҳавбек Грэйга шерик сифатида қанот футболчиси Спенсни туширди. Ўйиннинг биринчи соати ортда қолганида шу кунларда вирусга чалинган ва ярим соатдан ортиқ ўйнай олмайдиган Сон Ҳён Мин, Мэддисон ва Биссума ўйинни кучайтириш учун ташланди. Улар ҳужумкорликни оширишди, аммо ҳатто дурангни ҳам таъминлай олишмади. «Шпорлар» бу мавсумдаги ўйинларининг ярмида ютқазиб, турнир жадвалининг иккинчи қисмида қолмоқда, Эдди Ҳау жамоаси эса қаторасига олти ғалабадан кейин топ-4 учун курашни давом эттирмоқда.

«Манчестер Сити» – «Вест Ҳэм» 4:1
Голлар: 1:0 – 10, автогол Цоуфал, 2:0 – 42 Ҳоланд, 3:0 – 55 Ҳоланд, 4:0 – 58 Фоден, 4:1 – 71 Фюллкруг.
«Манчестер Сити» – Ортега, Гвардиол, Аке (Уокер, 61), Аканжи, Люис, Ковачич (Гундўған, 61), Савио (Макати, 80), Бернарду Силва, де Брюйне, Фоден, Ҳоланд (Грилиш, 84).
«Вест Ҳэм» – Ареоля, Уан-Биссака, Килмен, Тодибо (Мавропанос, 53), Цоуфал, Алварес (Ингз, 87), Соучек, Саммервилл, Лукас Пакета, Қуддус (Гилерме, 72), Фюллкруг.

Эски йилни ғалаба билан якунлаган «Манчестер Сити» январдаги илк ўйинини ҳам тетик ўтказди. Ниҳоят АПЛдаги илк голини урган Савинио «шаҳарликлар» сафидаги асосий ҳаракатлантирувчи куч бўлди ва унинг ҳаракатларидан кейин тўп «Вест Ҳэм» ҳимоячиси Цоуфалнинг оёғи орқали дарвоза тўрига бориб тушди.

Бўлим охирида Ҳоланд унинг узатмасидан кейин бўш бурчакни ишғол этиб, ҳисобдаги фарқни оширди. Тўрт тур давомида гол ура олмаган норвегиялик ҳужумчи охирги икки учрашувда ўз номини таблога ёздириб қўймоқда. Иккинчи бўлим бошларида у «иккинчи қават»дан ҳам гол уриб, ҳисобни йирик кўринишга келтирди.

«Вест Ҳэм» Ҳулен Лопетеги бошқарувида энг кучсиз даврини ўтказмоқда — «болғачилар» мухлислари буни трансляция режиссёри трибунада ўтирган Дэвид Мойесни кўрсатганида яна бир бор яққол ҳис қилишди. «Сити» эса ишонч билан инқироздан чиқаётганини намойиш этди. «Лестер» устидан қозонилган қуруқ ғалаба ноябр-декабр ойларидаги асабийлик тарқагани ва жамоа яна олдингидек эркин ўйнай бошлаганини кўрсатди. Амаддаги чемпионлар ўйиннинг қолган вақтида осонлик билан йирик ғалабани сақлаб қолди ва «Астон Вилла» турнир жадвалида ўзини қувиб ўтишига имкон бермади. Энди Гвардиола шогирдлари бешинчи ўриндаги «Нюкасл»ни кичик фарқ билан таъқиб қилмоқда, Чемпионлар лигасига йўлланма берувчи охирги ўрин билан орадаги фарқ эса икки очко.

Пеп эса ўйиндан кейин бу ҳали олдинги «Манчестер Сити» қайтганини англатмаслигини, «шаҳарликлар» «Эвертон»га қарши яхшироқ ўйнаганини (0:0) айтди. «Савинио зўр ўйнади, Ҳоланд иккита гол урди. Ҳаддан ташқари кўп ижобий нарсалар бор, аммо агар мендан сўрасангиз — жамоа олдинги йиллардаги каби ўйнаяптими десангиз — шундай дейман: «Йўқ! Мутлақо йўқ!».

«Кристал Пэлас» – «Челси» 1:1
Голлар: 0:1 – 14 Палмер, 1:1 – 82 Матета.
«Кристал Пэлас» – Ҳендерсон, Геҳи, Лакруа, Ричардс, Эзе (Нкетиа, 87), Сарр, Митчелл, Лерма, Дукуре (Камада, 69), Мунйос, Матета.
«Челси» – Санчес, Кукуреля, Колуилл, Ачимпонг, Густо, Кайседо, Фернандес, Санчо (Мадуэке, 86), Палмер, Нету, Жексон (Гиу, 81).

«Манчестер Сити» «Челси» инқироз ҳолатига тушиб қолгани туфайлигина ЕЧЛга йўллама берувчи ўринга шу қадар яқинлашишга муваффақ бўлган. Энцо Мареска муваффақиятсизликнинг асосий сабаби ёш жамоага бўлаётган кучли босим эмаслиги, аммо бу сўнгги натижаларнинг натижаларидан бири эканини айтди. Сўнгги тўрт турда — икки дуранг ва икки мағлубият қайд этилди, «Кристал Пэлас» билан дерби «Фулҳэм»га қарши ўйинни эслатиб юборди. Бу ўйинда ҳам Палмер тезкор гол урди, унга Санчо шведка усулида ажойиб пас йўллади. Бу ўйинда ҳам муваффақиятни ривожлантиришнинг имкони бўлмади. Фарқи шундаки, «Челси» «Фулҳэм»га ютқазганди (1:2), «бургутлар» билан эса дуранг ўйналди. Мезбонлар жавоб голига ҳақли ўйин намойиш этишди ва якунда намунали комбинацияда Сарр тўпни ҳимоячилар орасидан ўтказиб берди, Эзе бир тегинишда бўш дарвоза қаршисида пайдо бўлган Матетага голли пас берди.

«Брайтон» – «Арсенал» 1:1
Голлар: 0:1 – 16 Нванери, 1:1 – 61, пеналти Жоао Педро.
«Брайтон» – Вербрюгген, Эступинян, Игор Жулио (Уэбстер, 66), ван Ҳекке, Велтман, Айяри, Балеба, Аденгра (Митома, 62), О`Райли (Рюттер, 46), Груда (Минте, 46), Жоао Педро.
«Арсенал» – Райя, Калафиори, Габриэл, Салиба, Парти, Мерино, Жоржинио (Эдегор, 64), Райс, Троссар, Нванери (Мартинелли, 46), Габриэл Жезус.
Огоҳлантиришлар: Нванери (45+1), Велтман (64), Минте (82), Мерино (84), Калафиори (90).

«Ливерпул»нинг асосий таъқибчиси Брайтонда қоқилди. Ҳолбуки барчаси «Арсенал» учун муваффақиятли бошланган ва «чайкалар» прессингидан чиқиб кетган мезбонлар қарши ҳужум уюштирди ва Нванери ўткир бурчакдан гол урди. У «канонирлар»нинг 18 ёшгача АПЛда икки гол урган илк футболчиси бўлди.

Ҳисобда олдинга чиқиб олгач, «Арсенал» шошилмади. Айрим ҳолатларда ҳакам меҳмонлар тўпни ўйинга киритишини тезлаштириш учун соатига ишора қилди ва бўлим охирида бурчакдан тўпни ўйинга киритишга шошилмаган Нванерига сариқ карточка ҳам кўрсатди. Меҳмонлар 61-дақиқада жавоб голи ўтказиб юбормагунча вақт чўзишда давом этишди. Бу вазиятда эса Салиба тўпни қайтаришга уринганида боши билан Жоао Педронинг бошига тўқнашиб кетди.

Эътиборли жиҳати, шунга ўхшаш эпизод шу куни «Тоттенҳэм» – «Нюкасл» ўйинида ҳам рўй берган (бу ерда Гордоннинг бурни рақибнинг елкасидан зарбага учраб, қонаб кетганди) – бу ҳолатда пеналти берилмагани, бу ўйинда эса Энтони Тэйлов 11 метрлик нуқтани кўрсатди. Жоао Педро зарба беришдан олдин тўпни ўпди ва уни қарийб тўққизликка йўллади – 1:1.

Артета дарҳол реакция қилди. Жамоа сардори Эдегор Жоржинио ўрнига майдонга тушди. Ўйин очилди ва тезлашди, икки томон ҳам кўпроқ вазиятлар ярата бошлади. Аммо ҳисоб ўзгармай қолди.

«Арсенал» «Ливерпул» билан орадаги фарқни бештага қисқартирди, аммо лондонликлар иккита кўпроқ ўйин ўтказган. Слот жамоаси якшанба куни ўз майдонида «МЮ»ни қабул қилади. «Брайтон» эса бу мавсумда ўз уйида «катта олтилик»нинг тўрт вакилига қарши ўйнади ва ҳозирча ютқазмади (+3=1).

Испания: «Барселона»да енгил ғалаба

«Барбастро» – «Барселона» 0:4
Голлар: 0:1 – 21 Эрик Гарсия, 0:2 – 31 Левандовски, 0:3 – 47 Левандовски, 0:4 – 56 Торре.
«Барбастро» – Фабрега (Мендез, 86), Баггиори, Хименес, Морено, Оскар Арройо, Фунес, Гомез, Ара Саучо (Прат Серрано, 55), Хавито (Ортега, 78), Алонсо Арройо (Отео, 79), Ал-Ҳаддодий (Иниго, 55).
«Барселона» – Шченсни, Мартин, Мартинес (Кубарси, 62), Араухо, Кунде (Домингес, 62), Эрик Гарсия, де Йонг, Лопес, Педри (Гави, 46), Торре (Фернандес, 81), Левандовски (Фати, 62).

Тўртинчи дивизион вакили «Барбастро» Испания кубоги тарихида ушбу дивизион вакили бўла туриб, турнирдан ла лиганинг икки вакилини чиқариб юборган илк жамоа сифатида шуҳрат қозонганди. Аммо 2023 йил декабрида мағлуб этилган «Алмерия» ва бир ой муқаддам таслим этилган «Эспанол» — «Барселона» даражасида эмас. Лекин ушбу жамоа ўтган мавсумда каталонияликларга ҳам жиддий муаммо туғдира олганди (2:3).

Бу сафар эса меҳмонлар аралаш таркибни туширганига қарамай, осонлик билан йирик ғалабага эришди. Каталонияликлар дарвозасида ниҳоят Шченсни дебют қилди, ҳимояда Араухо жароҳатидан кейин илк бор мавсумда илк бор бошланғич таркибда тушди, Педри ва бу мавсумда асосий таркибдан тушиб қолган Френки де Йонг майдон марказида жуфтлик ҳосил қилди, Левандовски ҳужум марказида тушди. Бир йил муқаддам поляк бу стадионда ғалаба келтирган пеналтидан гол урганди. Бу сафар — иккинчи бўлим бошидаёқ дублни расмийлаштирди, кейин эса бутсасининг остки қисми билан рақиб оёғига зарба берди. Турнирнинг бу босқичида (1/16 финал) VAR йўқлиги уни эҳтимолий қизил карточкадан қутқариб қолди.

Якунда Левандовски 82 гол билан «Барса» тарихидаги топ-30 тўпурар рўйхатига кирди. Шанба куни у Чики Бегиристайндан ўзиб кетди ва унинг навбатдаги нишонлари — 85 тадан гол урган Хави ва Хулио Салинас. «Барбастро» билан ўйин қаҳрамони Пабло Торре эса рақиб хатосидан фойдаланиб бир гол урди ва яна икки голга узатма берди.

«Марбеля» — «Атлетико» 0:1
Гол: Гризманн (16).
«Атлетико» – Муссо, Галан, Лангле, Ле Норман, Молина, Галлаҳер (Лоренте, 75), Барриос (Коке, 46), Де Паул (Корреа, 75), Симеоне, Алварес (Сёрлот, 60), Гризманн.

«Атлетико» эса ортиқча куч сарфламасдан, биргина гол билан кифояланди. Бу гол Гризманн ва Жулиано Симеоне уюштирган комбинация орқали урилди, француз футболчиси аргентиналик жамоадошининг ўткир бурчакдан йўллаган зарбаси қайтганидан кейин тўпга биринчи бўлиб етиб келди. «Матрасчилар» кўпроқ гол уриши мумкин эди, аммо вазиятларидан фойдалана олмади, бир голи бекор қилинди, яна бир вазиятда «Марбеля»ни дарвоза тўсини қутқарди.

Италия: «Наполи» — етакчи

«Фиорентина» – «Наполи» 0:3
Голлар: 0:1 – 29 Нерес, 0:2 – 54, пеналти Лукаку, 0:3 – 68 Мактоминей.
«Фиорентина» – Де Хеа, Раниери, Комуццо, Морено (Колпани, 59), Соттил, Белтран (Куаме, 79), Паризи (Гозенс, 59), Мандрагора (Ричардсон, 73), Додо, Адли (Каталди, 79), Кин.
«Наполи» – Мерет, Оливера (Распадори, 89), Жезус, Рраҳмани, Ди Лоренцо, Мактоминей, Лоботка (Гилмор, 89), Замбо-Ангисса, Спинаццола (Маццокки, 86), Лукаку (Симеоне, 73), Нерес (Нгонж, 86).

«Аталанта» ва «Интер» суперкубок билан бандлигида «Наполи» биринчиликни қўлга олишга ҳаракат қилмоқда ва сўнгги вақтларда ёрқин ҳаракат қилаётган Давид Нерес туфайли бу йўлдаги илк қадамни ташлади. Кварацхелия жароҳат туфайли ўйнай олмаётганида бразилиялик футболчи мавсумнинг энг яхши футболчиларидан бири сифатидаги мақомини тасдиқлади, унинг голи эса нафақат тур, балки бутун чемпионат ҳит-парадларига кириши аниқ. Бу голни Лукаку бошлаб берди, Нерес эса бир неча ҳимоячини ортда қолдириб, тўпни тўсин ортига аниқ йўллади.

«Фиорентина» ўтган турда Туринда «Ювентус»га қарши ўйинда ташаббусни тўлиқ топшириб қўйганига қарамай, икки бор жавоб қайтариб, очкога эга бўлганди (2:2). Шанба кунги ўйинда ҳам Мойзе Кин яна гол урди, аммо Антонио Контенинг бахтига бу гол бекор қилинди. Иккинчи бўлим бошида эса Лукаку пеналтини аниқ ижро этиб, мураббийини тинчлантирди. Кўп ўтмай Мактоминай ҳисобни йирик кўринишга келтирди. Неаполитанликлар энди уч очкога ортда қолаётган «Аталанта» қандай жавоб қайтаришини кутади. «Интер» эса соядаги етакчи бўлиб қолмоқда, миланликларда тўрт очко камроқ бўлганига қарамай, захирасида икки ўйин бор.