Европа Иттифоқи давлатлари етакчилари ва НАТО бош котиби мудофаа масалаларини муҳокама қилмоқда

Европа давлатлари «ўз мудофааси учун кўпроқ масъулиятни зиммаларига олишлари керак», деди Европа Иттифоқи кенгаши раҳбари Антонио Кошта 3 феврал, душанба куни Брюсселда бўлиб ўтган Европа Иттифоқининг норасмий саммитида. У бу масала бўйича «стратегик муҳокама» бўлишини кутаётганини ва мудофаа соҳасидаги ҳамкорликни кенгайтириш, шунингдек, Британия каби учинчи давлатлар билан молиялаштириш ва шериклик масалаларини муҳокама қилиш ниятида эканини таъкидлади, деб хабар беради AFP.

Йиғилишда НАТО бош котиби Марк Рютте ва Буюк Британия бош вазири Кир Стармер ҳам иштирок этмоқда. Давлат ва ҳукумат раҳбарлари иккала сиёсатчи билан учрашмоқчи, шундан сўнг Кошта журналистларга қисқача маълумот беради.

Антонио Кошта ўзининг кириш сўзида, шунингдек, европаликлар «кучлироқ трансатлантик ҳамкорга, жумладан, НАТО контекстида» эга бўлишлари зарурлигини таъкидлади, бу эса «мудофаа соҳасига сезиларли қўшимча сармоя киритиш»ни англатади. Европа Иттифоқи етакчилари Украинага қарши қарийб уч йилдан бери агрессив уруш олиб бораётган Россияга қарши мудофаани кучайтириш масаласини муҳокама қилиши кутилмоқда. Яна бир муҳим мавзу АҚШнинг янги президенти Доналд Трампнинг Европа Иттифоқига қўшимча тарифлар жорий этиш ҳақидаги таҳдидлари, шунингдек, НАТО мамлакатлари мудофаа харажатларини ялпи ички маҳсулотнинг беш фоизигача оширишни талаб қилиши бўлади.

Европа Иттифоқи етакчилари Россияни «доимий таҳдид» сифатида кўрмоқда

«Биз ҳаммамиз Россия таҳдид эканлигини тушунишимиз керак, - деди Финландия бош вазири Петтери Орпо Европа Иттифоқининг мудофаа саммити олдидан Брюсселдаги DW мухбирига. - Россия Европа давлатлари, Европа Иттифоқи учун доимий таҳдиддир ва шундай бўлиб қолади. Бу фикр эмас, бу ҳақиқат». Шунинг учун Европа Иттифоқининг ҳар бир давлати мудофаа учун кўпроқ маблағ ажратишга тайёр бўлиши керак, дейди Орпо.

«Украина бу урушда ғалаба қозониши керак. Агар Россия ғалаба қозонишига имкон берсак, Путин давом этади, улар давом этади», — деди Дания бош вазири Метте Фредериксен. Европа Иттифоқи шошилиши керак, чунки Россия ва Путин нафақат Украинага, балки барчамизга таҳдид солмоқда», дея огоҳлантирди Фредериксен. Ўзини ҳимоя қилиш учун Европа Иттифоқи давлатлари мудофаа саноати ишини ошириши ва тезлаштириши, мудофаа соҳасида яқинроқ ва тезроқ ҳамкорлик қилиши, Украинанинг урушда ғалаба қозонишини таъминлаши керак, дейди Дания бош вазири.

Ўз навбатида, Люксембург бош вазири Люк Фриден «Европа мудофаа иттифоқи»ни яратиш зарурлигини эълон қилди: «Бугун биз мудофаа ҳақида, Европа мудофааси зарурати ҳақида гапиряпмиз. Биз «Украина 2.0» содир бўлишини истамаймиз».