Спорт | 16:24 / 03.06.2025
7496
3 дақиқада ўқилади

Аббос Файзуллаев Россиядаги илк совринини қўлга киритди

Ўзбекистонлик футболчи ўйиндан кейинги интервюсида мухлисларга ўзбек тилида миннатдорчилик билдириб, БААга қарши ўйинда жаҳон чемпионати йўлланмаси қўлга киритилишига умид билдирди.

Фото: Дмитрий Голубович/Чемпионат

Россия кубоги. Суперфинал
1 июн, «Лужники»
«Ростов» — «ЦСКА» 0:0
Пеналтилар серияси
— 3:4.
«Ростов» — Ятимов, Роналдо, Мелехин, Сако, Осипенко, Вахания (Лангович, 88), Шетинин (Байрамян, 88), Шанталий, Кучаев (Комаров, 73), Комличенко, Голенков (Сутормин, 79). 
ЦСКА — Акинфеев, Гайич, Дивеев, Виллиан Роша, Мойсес, Обляков, Кисляк, Бистрович (Файзуллаев, 73), Пянич, Койта (Мусаев, 67), Гуарирапа (Глебов, 87). 
Огоҳлантиришлар: Мелехин (45+5), Сако (58), Шетинин (82).

Москвадаги «Лужники» стадионида бўлиб ўтган Россия Кубоги–2024/25 суперфиналида ЦСКА жамоаси «Ростов» устидан ғалаба қозониб, кубокни ўзиники қилди.

Биринчи бўлимда армиячилар футболчиси Иван Обляков узоқ масофадан дарвозани ишғол этганди, бироқ гол офсайд туфайли инобатга олинмади.

Ўйиннинг қолган қисмида ҳам 0:0 ҳисоби ўзгармай қолди. Натижада жамоалар барча масалага пеналтилар сериясида ойдинлик киритадиган бўлди.

Футбол лотереясида эса тажрибали Игор Акинфеевнинг сейви Москва клубига ғалаба тақдим этди.

Шу тариқа, ЦСКА ўз тарихида 9-бор мамлакат кубогини қўлга киритди. Жамоа бу борада Москванинг яна бир клуби — «Локомотив» билан тенглашди.

Чемпионлар сафида ўзбекистонлик яримҳимоячи Аббос Файзуллаев 73-дақиқада захирадан туширилди.

Пеналтилар сериясида унгача навбат етиб келмади.

Россиядаги фаолияти давомида илк совринини қўлга киритган Аббос Файзуллев ўйиндан кейин «Матч ТВ» мухбири саволига ўзбек тилида жавоб қайтарди.

«Ўзбекча гапирмоқчиман. Қўллаб-қувватлаган барчага катта раҳмат. Бутун Ўзбекистон халқини ғалаба билан табриклайман. Худо хоҳласа, 5 июн куни яна бир ғалабага эришиб, жаҳон чемпионати йўлланмасини қўлга киритамиз», – деган 21 ёшли яримҳимоячи.

Футболчи Sport24’га берган интервюсида ўз жамоаси ғалабага ҳақлироқ бўлганини айтиб ўтган.

«Бу клубим сафидаги биринчи совриним, табиийки, шахсан мен учун кўп нарсани англатади. Финалга қадар анча қийинчиликларни бошдан кечирдик, осон бўлмаган ўйинларни ўтказдик, айниқса, «Зенит»га қарши пеналтилар сериясида ажойиб тарзда ғалаба қозондик. Ўйлайманки, биз совринга лойиқ эдик.

Якунланган мавсумни аввалгисига нисбатан ёмон ўтди деган бўлардим. Ўтган йили шахсий кўрсаткичларим 5 гол ва 14 ассист эди. Бу йил эса 3+8 билан якунланди.

Буни иккинчи даврада майдонда позициямни ўзгартирганим билан боғлайман. Бу шахсий кўрсаткичларимга таъсир қилди. Мавсумни яхши бошлагандим, кейин майдондаги позициямни ўзгартиришимга тўғри келди. Тўғри, статистик кўрсаткичларим ўзим кутганчалик чиқмади. Аммо янги позицияда ҳам самарали ўйин кўрсатишга ҳаракат қилдим», – деди Файзуллаев.

Мавзуга оид