Шавкат Мирзиёевнинг АҚШга амалий ташрифи якунланди

Ўзбекистон президенти Шавкат Мирзиёевнинг Америка Қўшма Штатларига амалий ташрифи тадбирларга бой дастур билан кечди ва якунига етди. Вашингтонда Оқ уйда президент Доналд Трамп билан музокаралар ўтказилди ҳамда Марказий Осиё мамлакатлари ва АҚШ етакчиларининг “С5+1” форматидаги саммити бўлиб ўтди.

Фото: Президент матбуот хизмати

Ташриф доирасида томонлар Ўзбекистон–АҚШ стратегик шериклигини янада ривожлантириш, шунингдек, “С5+1” форматидан фойдаланган ҳолда Марказий Осиё ва АҚШ ўртасидаги ҳамкорликни чуқурлаштириш юзасидан келишувларга эришди.

Президент Шавкат Мирзиёев сенатор Стив Дэйнс, конгрессменлар Кэрол Миллер, Билл Хайзенга ва Сидни Камлагер-Дав билан суҳбатлашди. Шунингдек, АҚШ савдо вазири Ховард Латник, Эксимбанк президенти ва раиси Жон Йованович, Халқаро молиявий тараққиёт корпорацияси бош ижрочи директори Бен Блэк, ҳамда General Motors International компаниясининг глобал ижрочи директори Шилпан Амин билан учрашувлар бўлиб ўтди.

Ташрифнинг ишбилармонлик қисмида АҚШ ишбилармонлари иштирокида давра суҳбати ташкил этилди. Учрашув ва музокаралар якунида қатор икки ва кўп томонлама ҳужжатлар имзоланди.

Тадбирлар якунлангач, Ўзбекистон президенти Тошкент шаҳрига жўнаб кетди.