1030883598 Kun.uz: 1 май куни Чехияда хоккей бўйича навбатдаги жаҳон чемпионати бошланади. Бу Чехияда ўнинчи маротаба шундай турнир ўтказилиши бўлади. Турнир 1 майдан 17 майгача Прага ва Остраве шаҳарларидаги муз майдонларида ўтказилади. Чехияликлар шу вақтгача ўз майдонларида ўтказилган турнирларнинг учтасида ғолиб бўлишган, охирги марта Чехияда ўтказилган жаҳон чемпионатида эса Канада терма жамоаси ғалабани нишонлаган эди. А гуруҳи ўйинлари Прага шаҳридаги О2 Аrеnа майдонида ўтказилади. Бу ўйингоҳ 17 минг томошабинга мўлжалланган. Бу гуруҳдан Канада, Швеция, Чехия, Латвия, Швейцария, Австрия, Франция ҳамда Германия термалари ўрин олишган. В гуруҳи ўйинлари эса Остраве шаҳридаги CЕЗ Аrеnа номли майдонда ташкил қилинади. Бу майдон 10 минг томошабинни ўзида сиғдира олади. Бу гуруҳда Россия, Беларусь, Финляндия, АҚШ, Норвегия, Словения, Словакия ва Дания хоккейчилари кейинги босқичга чиқиш учун кураш олиб боришади. Гуруҳ босқичи 12 май кунига қадар давом этиши белгиланган. Чорак финал ўйинлари 14 май куни икки шаҳарда ҳам бўлиб ўтади. 16-17 май кунлари эса яримфинал ва финал ўйинлари Прага шаҳрида ўтказилади. Турнирнинг асосий фаворитлари сифатида Канада, Россия ва Финляндия терма жамоалари қаралмоқда. Кейинги жаҳон чемпионати Россияда ўтказилиши белгилаб олинган. Чехиядаги турнирда энг ёмон натижа қайд этган икки жамоа Россияга бормайди, уларнинг ўрнида Қозоғистон ва Венгрия қатнашади. xab-