“Ўзбектелеком” акциядорлик компанияси 2012 йилдан буён муқобил энергия манбаларини қўллашни жорий қилиш бўйича бир қатор лойиҳаларни амалга оширди. Бу лойиҳалар алоқа объектларининг электр қуввати билан таъминотида узилишларга йўл қўймаслик учун амалга оширилган.
Компания сайтида эълон қилинган хабарномада таъкидланишича, “Ўзбектелеком” йирик энергия истеъмолчиларидан бири ҳисобланади. Алоқа объектлари узлуксиз равишда электр қувватига уланган бўлиши талаб этилади. Бу эса ўз навбатида кўп миқдорда электр қувватининг сарфланишига олиб келади.


Электр энергиясини тежаш ва электр тармоғининг ишончлилигини таъминлаш мақсадида 2012-2014 йилларда “Ўзбектелеком” бўлинмаларида тадбиркорлик субъектлари билан билан ҳамкорликда узоқ ҳудудларда жойлашган алоқа объектларини қуёш генераторлари билан таъминлаш лойиҳалари амалга оширилди. Жумладан, 2012 йилда Сурхондарё вилоятининг 2 қишлоғида, 2013 йилда Тошкент вилоятининг 3 қишлоғида 2013-2014 йилларда турли вилоятларнинг 12 узоқ туманларидаги АТСларда, 44 тумандаги базавий станцияларда қуёш электр станциялари барпо этилди.
“Бу борадаги ишлар давом этмоқда”, - деб таъкидланади хабарномада. Хусусан, муқобил энергия манбаларига ўтишни тезлаштириш мақсадида компания раҳбарияти томонидан “2014-2015 йиллар давомида муқобил энергия манбаларини (қуёш ва шамол генераторлари) ўрнатиш бўйича чора-тадбирлар режаси” қабул қилинди.