Украина президенти Пётр Порошенко дорилар учун солиқ тўлашни вақтинчалик бекор қилиш тўғрисидаги қонунни имзолади. Президент матбуот хизматининг маълум қилишича, ҳужжат асосида мамлакат Солиқ кодексига маълум ўзгартишлар киритилади.
Солиқлардан озод қилинувчи дори воситалари рўйхати Вазирлар Маҳкамаси томонидан белгилаб берилади.
Қонунга мувофиқ, 2019 йилнинг 31 мартига қадар Украинанинг божхона ҳудудига олиб кириладиган дори воситалари учун қўшимча қиймат солиғи ундирилмайди. Бу қонундан кўзланган мақсад дори воситаларининг нархини тушириш ҳамда урушдан энди ўнгланаётган аҳолини тўлалигича дори билан таъминлашдир.