Тошкентда 64 ва 100 катакли шашка бўйича Осиё чемпионати якунланди. Ўзбекистон Республикаси Маданият ва спорт ишлари вазирлиги, Осиё шашка конфедерацияси ҳамда мамлакатимиз шашка федерацияси ҳамкорлигида ташкил этилган мусобақада қитъамизнинг йигирмага яқин давлатидан 250 нафардан зиёд спортчи ғолиблик учун баҳслашди.

Мусобақада ҳамюртимиз Лазиз Муралиев 64 ва 100 катакли шашка бўйича блиц, рапид ва классик йўналишларида учтадан олтин ва кумуш медални қўлга киритди. Шунингдек, шашкачиларимиздан Алишер Ортиқов, Озодбек Ўрмоналиев, Ҳусниддин Жиянбоев, Саидқосим Алиев, Исломжон Каримов, Шаҳзод Қобилов, Мирзобек Рофиев, Аброр Олтибоев, Ҳошимжон Эргашев, Абдувоҳид Абдужабборов, Шердор Раҳимжонов, Муҳаммадюсуф Тоштемиров ўз ёш тоифаларида ғолиб ва совриндорлар қаторидан жой олди.

Хотин-қизлар ўртасида тўққиз карра Осиё чемпиони Шаҳзода Турсунмуродовага тенг келадиган рақиб топилмади. У барча йўналишларда тўртта олтин, биттадан кумуш ва бронза медаль билан тақдирланди. Сайёра Йўлдошева, Моҳинур Умарова, Лайло Тошпўлатова, Ирода Турсунқулова, Зебинисо Тошпўлатова, Зебинисо Мамасолиева, Сарвиноз Ҳасанова, Нигина Бозорова ўз ёш тоифасида совринли ўринни эгаллади.

Фахрийлар ўртасидаги баҳсларда Абдуқодир Тоштемиров, Мамасоли Тешабоев, Нина Ким муносиб иштирок этиб, совринли ўринларни қўлга киритди. Шу тариқа, чемпионатда ҳамюртларимиз жами 34 олтин, 27 кумуш, 24 бронза медални қўлга киритиб, умумжамоа ҳисобида биринчи ўринни эгаллади.