Қирғизистоннинг MegaCom алоқа оператори мижозларга ўзбек тилида техник хизмат кўрсатишдан воз кечмайди. Бу ҳақда Қирғизистон телеграф агентлигига компания матбуот хизмати ходимлари маълум қилди.

Эслатиб ўтамиз, кеча хонанда Бек Борбиев Facebook ижтимоий тармоғидаги саҳифасида компаниядан мижозларга ўзбек тилида хизмат кўрсатишни тўхтатишни талаб қилган. Агарда бу талаб 15 майга қадар бажарилмаса, у компанияга қарши муддатсиз норозилик митинглари ташкил этишга ваъда берган. Шунингдек, талаб бажарилмаган тақдирда у абонентларни компания хизматларидан воз кечишга чақирган.

Шунга қарамай, MegaCom ўзбекча сервисларни тўхтатмаслигини маълум қилди.
“Бизнинг компаниямиз Қирғизистон қонунчилиги доирасида ўз фаолиятини амалга оширади, бунда ҳеч қандай сиёсат йўқ. Биз маълумот олиш учун ўз она тилида мурожаат қиладиган абонентлар сонини эътиборга оламиз. Ўзбек тилли аҳоли мамлакатнинг жанубида кўп нуфусда истиқомат қилади, шу боис уларнинг ўз тилларида хизмат кўрсатиш ҳақида қарор қабул қилинган”, - дейди компания вакили.
Компания мижозларга қирғиз, рус ва ўзбек тилларида хизмат кўрсатади. Бу борадаги баёнотлардан бирида компания расмийлари Қирғизистондай кўп миллатли давлатда барча инсонларнинг она тилида хизмат кўрсатиш қонунчилик билан мустаҳкамланган ҳолат эканлигини таъкидлаб ўтишган эди.