2 майда филиппинлик боксчи Мэнни Пакьяога қарши жангни ютган ҳамда ўзида ўрта енгил вазн тоифасида WBA Super, WBO ва WBC талқини бўйича чемпионлик унвонларини йиға олган АҚШлик боксчи Флойд Мейвезер қайта жанг ўтказишдан бош тортди.   

Мейвезер келаётган шанба куни эфирга узатиладиган Showtime телеканалига берган интервьюсида Пакьяони “омадсиз ночор одам” ва “қўрқоқ” деб атаган ва унга қарши яна рингга кўтарилмаслигини айтган.     

“ESPN мухбири Стефен Смит билан суҳбат чоғида мен Пакьяога қарши яна жанг ўтказишга тайёрлигимни айтган эдим, бироқ энди ўз фикримдан қайтдим. Мен у билан жанг қилишни истамайман, чунки у омадсиз ва қўрқоқ одам. Ютқаздингми, буни тан олиб: “Мейвезер, сен мендан кучлироқ эдинг”, деб айтиши керак эди”, деди боксчи.   

Пакьяонинг жангдан кейинги матбуот анжуманида у елкаси жароҳати билан жанг қилгани, бу эса унинг ҳаракатларини чеклагани ҳақида айтган сўзлари Мейвезер норозилигига сабаб бўлди. Бироқ шунга қарамасдан, филиппинлик боксчи елка жароҳатини ўз мағлубиятининг асосий сабаби деб айтмади. 

«Узрлар, узрлар, узрлар. Мен уларни ҳисобга олмайман ва одамлар унга алданиб қолишларини истамайман. У ютқазганини билади. Бундан кейин менинг унга бўлган ҳурматим йўқолди”, деб айтди Мейвезер.

6 майда Пакьяо елкасини операция қилдирди. Энди у 9-12 ойдан кейин рингга чиқа олиши мумкин. Бундан ташқари, Пакьяо елкасидаги жароҳатни яширгани учун боксчилик фаолиятидан четлаштирилиши мумкин. 

Қоидаларга кўра, Пакьяо жангдан олдин жароҳати ҳақида маълум қилиши керак бўлган, бироқ у буни Невада атлетика комиссиясидан яширган. Комиссия барча тафсилотларни ўрганиб чиққандан кейин Пакьяони жазолаш ҳақида қарор қабул қилади. 

Пакьяо промоутери боксчининг жароҳати ҳақида АҚШ антидопинг агентлигига (USADA) хабар бергани ва жанг олдидан бир доза оғриқсизлантирувчи дори қабул қилишга рухсат олгани таъкидламоқда. Бироқ шунга қарамасдан Пакьяо жазоланиши муқаррар, чунки у жароҳати ҳақида нафақат USADA ни, балки Атлетика комиссиясини ҳам хабардор этиши керак эди.   

“Аср жанги” деб ном олган Мейвезер ва Пакьяо ўртасидаги жанг Лас-Вегасда 2 майдан 3 майга ўтар кечаси бўлиб ўтди. Мейвезер ҳакамларнинг бир овоздан қабул қилган қарори билан очколар бўйича жангни ютиб, ўзида WBA (Super), WBC ва WBO талқини бўйича жаҳон чемпиони унвонларини бирлаштира олди. Бундан ташқари, Мейвезер вазн тоифасидан қатъий назар жаҳоннинг энг яхши боксчиси унвонини олди.

Боксчиларнинг умумий гонорари 250 млн долларни ташкил қилди, жангни трансляция қилиш ҳуқуқини 53 та давлат сотиб олди. Жанг ташкилотчилари жангдан 500 млн доллар ишлаб олишни режалаштиришган.