Тошкент давлат иқтисодиёт университетининг спорт-соғломлаштириш мажмуасида ўрта махсус, касб-ҳунар таълими муассасалари ўқувчилари ўртасида кураш мусобақаси ўтказилди. Бу ҳақда ЎзА хабар бермоқда.

9 май – Хотира ва қадрлаш куни ҳамда Кексаларни эъзозлаш йилига бағишлаб ташкил этилган мусобақада 20дан ортиқ таълим муассасаси ўқувчилари ғолиблик учун куч синашди.

Вазни 55 килограммгача бўлган ёш полвонлар баҳсида Наврўзбек Қадамовга тенг келадиган топилмади. Элдор Маҳкамов иккинчи, Ойбек Содиқов учинчи ўринни эгаллади.

65 килограмм вазн тоифасида иштирок этган Шерзод Омонов барча рақибларини енгиб, шоҳсупанинг энг юқори поғонасидан жой олди. Аббос Қаҳҳоров кумуш, Шерзод Турсунбоев бронза медаль билан тақдирланди.

Мусобақанинг вазни 71 килограммгача бўлган полвонлар беллашувида Беҳзод Панжиев олтин медаль билан тақдирланди. Жавоҳир Қосимов кумуш, Шерзод Абдусатторов бронза медални қўлга киритди.

Ғолиб ва совриндорлар диплом ҳамда эсдалик совғалари билан тақдирланди.