Интернетда ўзига хос видеолавҳа пайдо бўлди. Унда Оқ Уй олдидан Россия танкларининг ўтиши қайд қилинган. Қисқа муддатда минглаб фойдаланувчилар ушбу видеони томоша қилишга улгурди. Махсус хизматлар кадрларни ўрганиб чиқишди. Маълум бўлишича, лавҳа ижодкорлари Москвадаги Ғалаба Паради кадрларини Оқ Уй тасвирига проекция қилган.
“Вести” газетасининг маълум қилишича, россиялик айрим ижодкорлар АҚШ президентининг парадга ташриф буюришдан бош тортгани туфайли “Обама парадга келмаса, парад Обамага боради” қабилида иш тутишга қарор қилишган.
Украина матбуоти ушбу видеолавҳани “Россиянинг навбатдаги провокацияси” деб баҳолаган.
Видеолавҳани ким тайёрлагани аниқланган: лавҳа сўнгида “вежливыетанки.рф” ёзувини кўриш мумкин. Бу “Сеть” ёшлар лойиҳасига тегишли сайтдир.
“Ҳозир биз фестивалга тайёргарлик кўрмоқдамиз. Уни қўллаб-қувватлаш учун болалар видеоролик суратга олишган эди. Май ойида уни интернетга жойлаштиришга қарор қилдик. Бир кунда у миллион марта кўрилди. Биз буни кутмагандик. Бу провокация эмас, шунчаки ўз фестивалимизни реклама қилмоқчи эдик”, - деди лойиҳа матбуот котиби Анастасия Мельник.