Афғонистон қуролли кучлари томонидан ўтказилган амалиётлар чоғида 51 нафар Толибон жангариси йўқ қилинган. Бу ҳақда мамлакат ички ишлар вазири ОАВ вакилларига баёнот берган.
“Амалиётлар Кунар, Нангархор, Боғлон, Қундуз, Фарёб, Бадахшон, Сарипул, Жузжон, Қандаҳор, Зобул, Урузгон, Лоғар, Ғазни, Пактия, Ҳирот, Бодғис вилоятларида ўтказилди. Амалиётлар давомида Толибон ҳаракатининг 51 нафар қуролли аъзоси ўлдирилди, 15 нафари яраланди, 1 нафари Афғонистон хавфсизлик кучлари томонидан қўлга олинди”, - дейилади хабарнома матнида.
Афғонистон ҳарбийлари орасида йўқотишлар бўлган-бўлмагани ҳақида маълумот берилмаган.
Шу билан бирга, матбуотда қарама-қарши хабарлар пайдо бўлмоқда. Жумладан, Толибон ҳаракатининг 35 нафар вакили яралангани, 4 нафари қўлга олингани айтилмоқда.
Бундан ташқари, Бодғис вилояти маъмурияти вакили Мирвайс Мирзақволнинг маълум қилишича, вилоят жангарилар қўлига ўтган. “Улусвол жангарилар қўлида, полиция ва маҳаллий бошқарув вакиллари қочиб кетди”, - унинг сўзларини келтиради Reuters агентлиги.
Шунингдек, 24 апрелдан буён Қундуз вилоятида кенг миқёсли ҳарбий амалиётлар олиб борилмоқда. Жангарилар билан тўқнашувлар давом этмоқда.