Кеча Москвада Иккинчи Жаҳон урушидаги ғалабанинг 70 йиллигига бағишлаб ўтказилган тантаналар чоғида Шимолий ва Жанубий Корея вакиллари ўртасида қисқа суҳбат бўлиб ўтди. Бу ҳақда Жанубий Кореянинг Ёнхап ахборот агентлиги маълумот берди.
Москвадаги маросимларга Шимолий Кореядан Олий халқ мажлиси президиуми раиси Ким Ён Нам, Жанубий Кореядан эса президентнинг махсус вакили Юн Сан Хён ташриф буюрган эди. Ҳарбий параддан сўнг улар ўзаро қисқача мулоқот қилишган. Аммо, шу билан бирга, улар бирор бир масалада муайян келишувга эришмаган.
Москвага келишдан олдин Жанубий Корея сиёсатчиси қўшни давлат вакили билан учрашиш ёки суҳбатлашиш нияти йўқ эканлигини маълум қилса-да, аксарият экспертлар икки томон ҳам Москвадаги учрашувдан фойдаланишини тахмин қилаётган эди.