Ўзбекистон тижорат банклари 2020 йилга қадар банк назорати бўйича “Базель-III” стандартларини босқичма-босқич жорий этишлари керак. Бу ҳақда Ўзбекистон Президенти томонидан 2015 йил 6 майда имзоланган қарорда белгилаб қўйилган, дея хабар бермоқда "РИА Новости".

Хусусан, кейинги беш йил давомида регулятив капиталнинг минимал етарлилик коэффициентини 14,5 фоизга (ҳозир 10 фоиз), I даражали капитал етарлилик коэффициентининг минимал кўрсаткичини 11 фоизга (5 фоиз) етказилиши керак.

Аввалроқ, Ўзбекистоннинг барча тижорат банкларига 2015 йил 1 январига қадар, “Базель III” стандарти нормалари татбиқ этилаётгани муносабати билан ликвидлик қоплами нормасини 100 фоизга етказиш мажбурияти юкланган эди.

Қарорда қайд этилишича, Ўзбекистон банкларининг фаолияти тўғрисидаги маълумотларни очиқлигини таъминлаш бўйича чоралар янада кучайтирилади, хусусан, банклар ўзларининг йиллик ва оралиқ молиявий ҳисоботларни ўз веб-сайтларида ёки банк сири тўғрисидаги қонунчиликка зид бўлмаган бошқа йўллар билан эълон қилишлари керак.

Ҳозирги вақтда Ўзбекистон банк тизимида 26 тижорат банки фаолият олиб бормоқда, уларнинг учтаси давлат, бештаси – хорижий капитал иштирокида, ўнтаси акциядорлик ва саккизтаси хусусий банклардир.