ОАВда бин Ладеннинг ўлими ҳақида янги маълумотлар пайдо бўлди. Улар америкалик журналист Сеймур Хершнинг London Review Books нашрида эълон қилинган ҳисоботига асосланади.
Таъкидланишича, “Ал-Қоида” ҳаракати етакчиси Усома бин Ладеннинг ўлдирилиши ҳақида Вашингтон нотўғри ахборот тарқатган.
Хершнинг қўлидаги маълумотларга қараганда, Покистон разведкаси террорчини 2006 йилда қўлга олган. Шундан буён 2011 йилда ўлдирилгунга қадар у Аббосободда назорат остида сақланган. Террорчини АҚШга бирор-бир хизмат эвазига бериб юбориш кўзда тутилганди, аммо 2010 йилда ҳарбийлардан бири уни Вашингтонга 25 млн долларга сотиб юборган. Шундан сўнг америкалик махсус қисмлар бин Ладен сақланаётган бино ҳақида маълумот олиб, уни йўқ қилиш бўйича амалиёт ўтказган.
Журналистнинг қайд қилишича, бин Ладен ногирон бўлгани боис уни йўқ қилиш катта қийинчилик туғдирмаган.
CNN каналининг маълумот беришича, Оқ Уй расмийлари бу ҳисоботдаги маълумотларни инкор қилмоқда. “Биз “ал-Қоида”ни йўқ қилиш йўлида Покистон билан ҳамкорлик қилганмиз, аммо бу бошидан охиригача АҚШнинг ўз операцияси эди”, – дейилади Оқ Уйнинг матбуот учун расмий баёнотида.