Россиялик ишлаб чиқарувчилар юридик шахсларга ўзларининг “Эльбрус-401” компьютерларини 200 минг рублдан сотишаётган бир пайтда, Калифорнияда жойлашган Next Thing Co. компанияси муҳандислари нархи 9 доллар турадиган митти компьютер ишлаб чиқишди (жорий курс бўйича 450 рублдан сал кўпроқ). Бу “миттивой” C.H.I.P. деб аталади ва ўзининг платасида инсон қаерда бўлишидан қатъий назар, ўзи учун зарур бўлган дастурлар билан фойдалана оладиган барча зарур қисмларга эга.

Arduino ва Raspberry Pi каби микроконтроллёрлар компьютер тхтирочилари орасида жуда оммавийлашиб кетди. Улар бу микроконтроллёрлар негизида янгидан-янги қурилмалар яратишмоқда. Бироқ бу микрокомпьютерларнинг нархи 35-40 доллардан кўпроқни ташкил қилади. Улар олдида C.H.I.P. деярли бепул таклиф қилинмоқда. Бу миттивой ўзидан нимани намоён қилади?

C.H.I.P. 1 ГГц такт частотасида ишловчи марказий процессор, 512 Мб тезкор хотира ва операцион тизим, дастурлар ва маълуморлар учун 4 Гб хотирадан ташкил топган. Микроконтроллёрда, шунингдек, 802.11 b/g/n, Bluetooth 4.0 симсиз алоқа модули, USB ва microUSB портлари, тасвир ва овозни чиқариш учун портлар ўрнатилган. Платанинг ўлчами бор-йўғи 6 см га 4 см ни ташкил қилади.

Бу микроконтроллёрга қўшимча сифатида VGA (10 доллар) ёки HDMI (15 доллар) портлари орқали тасвирни чиқариш ташқи адаптерини сотиб олиш мумкин. Шунингдек, C.H.I.P. ни тўлақонли чўнтак компьютерига айлантиришга имкон берадиган кичик дисплей ва клавиатурага эга PocketC.H.I.P. гаджетини ҳам сотиб олиш мумкин. Бу гаджет корпусида 5 соат узлуксиз равишда ишлашга етадиган ички аккумулятор ўрнатилган.

C.H.I.P. open source операцион тизими остида ишлайди. Микроконтроллёр аввалбошдан ўз хотирасида кўплаб фойдали дастурлар (Chromium браузери, LibreOffice офис пакети, GIMP график муҳаррири ва бошқа) ва ўйинлар сақлайди. Микроконтроллёр комплектига фойдаланувчи агар истаса янги дастурларни ишлаб чиқишига имкон берадиган дастурий таъминот ҳам киритилади.

Компьютер яратувчилари Kickstarter майдончасида ушбу компьютерни оммавий равишда ишлаб чиқиш учун талаб қилинган 50 минг доллар ўрнига анча кўпроқ маблағ, яъни 130 минг доллар йиғишга муваффақ бўлишди. Кўринишича, арзон микрокомпьютер ғояси Kickstarter нинг қарийб 3 минга яқин фойдаланувчиларига манзур бўлганга ўхшайди. Илк компьютерлар харидорларга 2016 йил майидан бошлаб юборилади, унгача эса ишлаб чиқарувчилар мавжуд ишчи прототип устидаги ишларни охирига етказиб, унга қўшимча дастурий таъминотни яратишлари керак бўлади.