Дубайда сувости меҳмонхонаси ва виллаларини қуриш режалари авж олаётган пайтда Польша архитектура фирмаларидан бири Дубайда сувости теннис кортини яратиш ғоясини таклиф қилмоқда. Ғоя муаллифи ва 8+8 Concept Studio компанияси эгаси, польшалик архитектор Кшиштоф Котала айни пайтда бу лойиҳани амалга ошириш учун сармоядорлар қидириш билан шуғулланмоқда ҳамда Дубайнинг “иқтисодий гигантларига” умид билдирмоқда.   

Архитекторнинг айтишича, катта сармоялар қурилиш секторига жиддий инвесторларни жалб қилади. Ўз навбатида, бундай лойиҳалар сайёҳлик оқимининг ошиши ҳисобига катта даромад олишга ёрдам беради.

Маълумки, Дубайда 2020 йилда Халқаро кўргазма бўлиб ўтади. Кўргазмага 25 млн киши ташриф буюриши кутилмоқда.

Сувости теннис корти ўзида спорт мусобақалари, кўнгилочар тадбирлар ва кўргазмалар ўтказиш учун мўлжалланган еттита аренадан иборат замонавий спорт мажмуасини акс эттиради.

Мажмуанинг қурилишида замонавий технологиялар ҳамда нано-цемент ва углерод ойнаси каби экологик тоза хомашёлардан фойдаланиш режалаштирилмоқда. Коталанинг айтишича, лойиҳа сметаси ҳозирча тайёрланмаган. Лойиҳанинг якуний баҳоси қурилиши учун 5 йил кетиши мумкин бўлган объектнинг концепциясига боғлиқ бўлади.

Дастлабки ҳисоб-китобларга кўра, лойиҳа бир неча миллиард долларни ташкил қилиши мумкин.