2016 йилда Францияда бўлиб ўтадиган Европа чемпионати учрашувларига тахминан 2,5 миллион дона чипталар сотувга чиқарилади. Бу ҳақда УЕФА расмий сайти хабар тарқатмоқда.

Шундан 1,8 миллиони мухлислар учун (умумий чипталарнинг 75 фоизи)
чиқарилади. Шундан бир миллиони 10 июндан бошлаб очиқ савдога чиқарилади. Яна 800 мингта чипталар эса саралаш босқичи ниҳоясига етгач, мамлакатлар миқёсида тақсимлаб чиқилади.

Мусобақанинг энг арзон чиптаси гуруҳ босқичидаги учрашувга бўлиб, унинг баҳоси 25 еврони ташкил қилиши кутилмоқда. Чорак финалнинг энг арзон чиптаси 45 евро, ярим финал ва финал учрашувларида эса мос равишда 65 ва 85 еврони ташкил қилиш кутилмоқда. Чипталарнинг энг қиммат нархи финал ўйини учун биринчи категориядаги чипталар бўлиб унинг нархи 895 еврони ташкил қилади. Очилиш учрашуви учун чипталар 75 евродан 595 еврогача бўлиши кутилмоқда.

Шунингдек, ташкилотчилар чипталар пакетини ҳам сотувга қўйиш ниятида. Саралаш мусобақалари якунлангач, маълум ҳудуд учун ўз жамоасини қўллаб қувватлаш учун чипталар жамланмасини сотиб олиш имконияти мавжуд бўлади.

20 мингга яқин чипта эса хайрия дастури асосида болалар уйидаги етим болаларга тарқатилади.

Маълумот ўрнида таъкидлаб ўтиш жоиз, мусобақалар 2016 йилнинг 10 июнидан 10 июлига қадар бўлиб ўтади.