Мерлин лақабли британиялик мушук энг баланд овозда миёвлайдиган мушук сифатида Гиннесс рекордлар китобига киритилди, деб хабар бермоқда The Daily Mail нашри. Мерлин чиқарадиган товушлар баландлиги 67,8 Дб деб баҳоланди. Таққослаш учун, оддий уй мушуклари 25 дБ атрофида миёвлайдилар.

Рекордчи мушукнинг эгаси Трейси Вествуднинг айтишича, у телефонда суҳбатлашганда суҳбатдошлари баъзан унинг уйидан “қандайдир шовқин” келаётганидан шикоят қилишади. “Мен уларга бу менинг мушугим миёвлаётганини айтаман. Бироқ улар менга ишонишадими-йўқми, билмайман”, дейди Мерлиннинг эгаси.

Мушук Вествудлар оиласида 13 йилдан бери яшайди. У Торки шаҳридаги (Девон графлиги) ҳайвонларни қутқариш марказидан боқиб олинган. Қайд этилишича, Мерлин мушук бола бўлганидаёқ катта мушуклардан баландроқ миёвлаган. У яшаган уйда унинг миёвлашини фақатгина яна бир уй ҳайвони – кар итгина эшита олмаган.

Икки йил аввал Вествуд у пайтда баланд овозда миёвлаш бўйича рекордчи бўлган Смоки мушуги ҳақида билиб қолди. Бу мушукнинг миёвлаши товуши 67,68 Дб га етган. Вествуд унинг мушуги Смокидан баландроқ миёвлаши мумкинлигини ҳис этиб, экспертларни чақиртирди. Натижада Гиннесс рекордлар китоби вакиллари Мерлиннинг миёвлаши товушини махсус асбобларда ўлчаб, янги ютуқни қайд қилишди.