Тошкент қувур заводи ўтган йилдан бошлаб майда нав, иссиқ чигирланган металл прокати (диаметри 6,5 ммдан 12 ммгача бўлган ингичка чивиқ пўлат) ишлаб чиқаришга киришди.

Бу ҳақида “Тошкент қувур заводи” қўшма корхонасининг 2 – ишлаб чиқариш мажмуаси бошлиғи Зафар Норхўжаев маълум қилди.

Унинг сўзларига кўра, янгидан бунёд этилган замонавий, юқори самарали металлургия мажмуасининг биринчи навбати лойиҳа қуввати 250 минг тоннани ташкил этган.

“Ушбу мажмуанинг қурилиши мисли кўрилмаган даражада қисқа муддат, яъни бор-йўғи 14 ой мобайнида пойтахтимизнинг Сирғали саноат ҳудудида амалга оширилди. Мажмуани барпо этишга хорижий таъсисчилар катта сармоялар киритдилар, бу эса ўз навбатида лойиҳанинг муваффақиятини таъминлади. Хитой металлургия институти томонидан лойиҳалаштирилиб, ушбу мамлакатнинг энг йирик ишлаб чиқарувчилари томонидан тайёрланган замонавий юқори самарали асбоб-ускуналарни монтаж қилиш ва ишга тушириш чора-тадбирлари бевосита хитойлик юқори малакали техник мутахассислар ва ишчилар иштирокида ўз вақтида ва сифатли қилиб бажарилди. Натижада, республикамизда талаб катта бўлган импорт ўрнини босувчи пўлат қувурларнинг йирик ишлаб чиқарувчиси сифатида фаолият бошлаган корхонамиз, яна металлургия маҳсулотларини ишлаб чиқарувчи йирик корхонага ҳам айланди”, – дея таъкидлади Норхўжаев.

У корхонада ўрнатилган металл ёядиган машинанинг узунлиги деярли бир километрни ташкил этишини, айрим техник-иқтисодий кўрсаткичлари ва конструкторлик ечими бўйича ушбу ускуна нафақат Марказий Осиё, балки МДҲ минтақасида ҳам ягона эканлигини билдирди.
“Жорий йилда корхона томонидан биргина металлургик маҳсулотларни 200 минг тонна ҳажмда ишлаб чиқариш режалаштирилган. Ўрта муддатли истиқболда квадрат ва олти бурчакли кўндаланг кесимли чивиқларни серияли ишлаб чиқаришни йўлга қўйиш назарда тутилган. Шунда Тошкент қувур заводининг ўрнатилган ишлаб чиқариш қувватлари йилига 500 минг тонна юқори ликвидли маҳсулотга яқинлашади”, – дея таъкидлади корхона вакили.