АҚШ Сенатидаги Республикачилар ва Демократлар фракциялари Осиё ва Тинч океани минтақаси билан савдо тўғрисидаги қонун лойиҳаси борасида муросага эришди. Қонун қабул қилинган тақдирда, минтақанинг 11 давлати билан олиб бориладиган савдо шартлари эркинлаштирилади.

Politico нашрининг ёзишича, қонунда кўрсатилган асосий шарт божларни камайтириш ёки умуман йўқ қилишдир. Партиялар таклиф қилинган ўзгаришлар бўйича алоҳида овоз бериш ўтказиб, бир хулосага келишга муваффақ бўлди. Илгарироқ демократларнинг бир қисми ўзлари томонидан олиб чиқилган бу ташаббусга қарши чиқиб, қонун лойиҳасини муҳокамадан чиқаришга ҳаракат қилган эди. Шу каби келишмовчиликлардан сўнг қонун лойиҳаси борасида келишувга эришилгани айтилмоқда.

Айни пайтда қонун лойиҳасида кўзда тутилган шартномалар касаба уюшмаларининг норозилигига сабаб бўлмоқда, негаки бу хорижий ишлаб чиқарувчилар билан рақобатнинг кучайишига олиб келади. Ўз навбатида, шартномаларнинг амалга оширилиши ҳамда божларнинг олиб ташланиши ёки туширилиши АҚШ экспортчиларига Осиё ва Тинч океани минтақасидаги нарх-навода маълум рақобатбардошликка эришишга ёрдам беради.