Люк Бессон ўзининг твиттердаги биринчи хабарида “Валериан ва Лаурелин” француз илмий-фантастик комиксини экранлаштиришни режалаштираётганини маълум қилди. Бу ҳақда The Hollywood Reporter нашри хабар бермоқда.

Бош ролларни Дейн Де Хаан ва Кара Делевинь ижро этадиган ушбу фильм 2017 йилнинг ёзида экранларга чиқарилади. Бессоннинг аввалги фильми – бош ролда Скарлетт Йоханссон суратга тушган “Люси” экшн-триллери 2014 йилда намойишга чиқарилган эди.

Янги комикс фильм қаҳрамонлари – Валериан ва Лаурелин исмли икки нафар махфий агент вақт ва фазо бўйлаб саёҳат қилишади. Пьер Кристин ва Жан-Клод Мезьер яратган ушбу комиксдаги воқеалар узоқ келажакда – 28 асрда рўй беради.