Семириш муаммоси АҚШ иқтисодиётига жиддий зарар етказиши мумкин. Бу ҳақда The Washington Times газетаси Брукинг институтида ўтказилган тадқиқотга таянган ҳолда маълум қилди.

Экспертларнинг ҳисоб-китобларига қараганда, айни пайтда семиришдан азият чекаётган 12.7 млн болалар ёшлари улғайганга қадар оза олмаса, уларга қаратилажак ижтимоий харажатлар 1.1 трлн долларни ташкил қилади. Бу сумма АҚШ ялпи ички маҳсулотининг 6.6 фоизига тенгдир.
Илгарироқ семиришнинг АҚШ иқтисодиётига келтирадиган зарари бундан уч баробар кам бўлиши айтилган эди.

Брукинг институти тадқиқотчиси Мэттью Касманнинг таъкидлашича, келтирилган рақамлар “айсбергнинг учи” холос, иқтисодиётга келтириладиган зарар бундан-да каттароқ бўлиши мумкин.
Бугунги кунда АҚШда вояга етганларнинг 34.9 фоизи семиришдан азият чекади. 90-йилларда уларнинг мамлакат аҳолисидаги улуши 10 фоизни ташкил этарди. Шу пайтнинг ўзида семиришга учраган ёшлар миқдори 5 фоиздан 17 фоизга етди.