Тошкент шаҳрининг Чилонзор туманидаги хусусий корхоналардан бирининг собиқ ходими ўз бошлиғидан пул ундириш учун унинг номидан сохта тилхат ёзиб, ички ишлар бошқармасига арз қилди. Аммо текширув натижасида унинг ўзи ҳужжатларни сохталаштиришда айбланиб, судга топширилди.

“Огоҳ” газетасида ёзилишича, 1959 йилда туғилган Толиб Эшназаров қурилишга ихтисослашган МЧЖ директори Оқилхон Қосимов билан танишиб қолиб, ўзини қурувчи деб таништирган ва синов муддатига ишга олинган. Ўша пайтда МЧЖ тоғ оромгоҳи қуриш бўйича тендерда иштирок этаётган эди. Қосимов фирма муҳри туширилган ва ўзининг имзоси қўйилган бўш қоғозни Эшназаровга бериб, ўзи йўқлигида, шошилинч вазиятларда ишлатишини айтган.

Синов муддати тугагач, Эшназаровнинг ишлашини ёқтирмаган Қосимов уни бўшатиб юборган. Собиқ бошлиғидан қасос олиш учун Эшназаров унинг олдига бориб, турил баҳоналар билан 1 800 000 сўм тама қилган. Аммо иккинчи сафар Қосимов пул беришдан бош тортган.

Шунда Эшназаров муҳр ва имзо қўйилган бўш қоғозга принтердан тилхат чиқартириб, ички ишлар бошқармасига мурожаат қилган. Тилхатда Қосимов гўёки фирма балансидаги Lacetti машинасини унга 50 млн сўмга сотгани акс этган. Эшназаров Қосимовга бу пулларни бергани, аммо машинани олмаганини иддао қилган.

Ўтказилган текширувларнинг дастлабки босқичларидаёқ Эшназаровнинг ёлғон гувоҳлик бераётгани аниқланган. Натижада унинг ўзи ёлғон гувоҳлик бериш ва қаллобликда айбланиб, судга топширилган.