Германиянинг Knauf компанияси ўзининг Бухоро вилоятидаги иккита заводида 52,5 млн долларлик янги инвестицион лойиҳани амалга оширишни бошламоқда.

Жорий йилда немис компанияси ва “Ўзқурилишматериаллар” АК янги келишув имзолайди, бу келишувнинг амалга оширилиши Ўзбекистон Президентининг “Ўзбекистон Республикаси ва Германия Федератив Республикаси ўртасидаги иқтисодий ҳамкорликни янада кенгайтириш чора-тадбирлари тўғрисида”ги қарорида кўзда тутилган.

“Томонлар билан Бухоро вилоятидаги Knauf заводларида қуруқ қурилиш қоришмалари ишлаб чиқарувчи янги қувватлар ва гипсокартон листлар ишлаб чиқариш бўйича қўшимча линияларни қуришни назарда тутувчи келишув имзоланди. Бу ишлаб чиқариш қувватлари йилига 120 минг тонна қуруқ қоришмалар ва 8 млн квадрат метр гипсокартон олишга имкон беради”, деб айтмоқда “Ўзқурилишматериаллар” АКнинг иқтисодий таҳлил бошқармаси бошлиғи Ўткир Турдиев.

Knauf бундан аввал Ўзбекистонга 51 млн доллар миқдорида инвестиция киритган эди. Ҳозирда Бухоро вилоятида иккита звод – қуруқ қурилиш қоришмалари ишлаб чиқарувчи “Бухорогипс” қўшма корхонаси ва гипсокартон листлари ишлаб чиқарувчи “КНАУФ Гипс Бухоро” хорижий корхонаси фаолият юритмоқда.

Биринчи корхона ўз фаолиятини 2009 йилда бошлаган, унинг ишлаб чиқариш қуввати йилига 60 минг тонна маҳсулотдан иборат. Иккинчи завод эса 2011 йилдан ўз фаолиятини бошлаган, унинг ишлаб чиқариш қуввати йилига 20 млн кв метр гипсокартонни ташкил қилади.