Чехияда бўлиб ўтаётган хоккей бўйича Жаҳон чемпионатининг яримфиналида Россия АҚШ устидан 4:0 ҳисобида йирик ғалаба қозониб, мусобақанинг финалига йўл олди. Барча шайбалар ўйиннинг учинчи таймида киритилди.

Россиялик хоккейчилар мусобақанинг гуруҳ босқичида АҚШлик хоккейчиларга 4:2 ҳисоби билан имкониятни бой берган бўлсаларда, букмекерлар ушбу ўйинда айнан Россияни фаворит деб ҳисоблашаётган эди. Олег Знарок ўйинчиларининг жанговар руҳини ушбу ўйинга океан ортидан етиб келган Александр Овечкин кўтарди.

Барча шайбалар ўйиннинг 3-таймида киритилди. Таймнинг бошида америкалик хоккейчилар кескин ҳужумлар уюштиришни давом эттиришди, бироқ Россия термаси дарвозабони Сергей Бобровский барча зарбаларни қайтаришга муваффақ бўлди. Ўйиннинг 48-дақиқасида россияликлар тезкор ҳужум уюштиришлари натижасида ўзларининг ниятларига етдилар: Сергей Мозякин шайбани ўз майдонидаги кўк чизиқдан эгаллаб олиб, бутун майдонни кезиб ўтиб, рақиб дарвозасига ажойиб тарзда зарба йўллаб, ҳисобни очди.

Тўрт дақиқа ўтиб Александр Овечкин ўзининг ажойиб ўйинини намойиш қилди: рақибнинг икки ўйинчисини алдаб ўтиб, АҚШ дарвозабони Хеллебайк дарвозасига иккинчи шайбани киритди. Ўйиннинг 56-дақиқасида Вадим Шипачев учинчи шайбани киритди. Ўйин якунланишига оз фурсат қолганда Евгений Малкин дарвозабонининг ўрнига олтинчи ўйинчини туширган америкаликларнинг бўш дарвозасига тўртинчи шайбани киритди.

Энди Россия терма жамоаси финалда Чехия-Канада яримфиналида чехлар устидан 2:0 ҳисобида ғалаба қозонган канадаликлар билан куч синашади.