Миср бош вазири Иброҳим Махлуб 17 майда Иброҳим ал-Хунайдийни Миср Адлия вазири этиб тайинлади, деб хабар бермоқда Мисрнинг “Масрави” янгиликлар портали.

Мисрнинг амалдаги Адлия вазири Маҳфуз Собур телевизион интервью пайтида камбағаллар хусусида айтган ҳақоратомуз сўзлари учун танқидга олингандан кейин 11 майда истеъфога чиқишга ариза берди. Собур айтган сўзлар “ирқчилик ва камбағаллар учун ҳақоратли” деб баҳоланган эди.

Франс Пресс агентлигининг маълумотларига кўра, Собур TV10 телеканалига берган интервьюсида “чиқинди тозаловчилар фарзандлари суд ҳаками бўлиш учун жуда одмилар” деб айтган эди. Бундан ташқари, Собур “бундайлар муаммоларга дуч келишлари ва ҳаттоки тушкунликдан азият чекишлари мумкин, суд ҳаками эса муносиб қатламдан бўлиши керак” деб айтган эди.