Санкт-Петербургда Россия президенти Владимир Путинга ҳайкал ўрнатилди.

Бронза ҳайкал Россия етакчисининг рим императорларига хос қиёфадаги бюсти шаклида ишланди.

Ҳайкалнинг ўрнатилиши ташаббуси билан Ирбис казакларининг православ иттифоқи казаклари чиқишди. Петербург казаклари атамани Андрей Поляковнинг айтишича, Путинга ҳайкал қўйиш ғоясининг пайдо бўлишига Қримнинг аннексия қилиниши туртки берган. Унинг фиркича, Путин шу тариқа “азалий рус ерлари”ни қайтариб олмоқда.

“Бизнинг президентимиз жасурлик ва донолик тимсолидир. Бизнинг давлатимиз эса ҳақиқий Россия империясидир. Шунинг учун ўз ғоямизни амалга оширишда рим императори қиёфасидан фойдаланишга қарор қилдик”, деб айтмоқда атаман.

Хабар берилишича, Россиянинг Латвиядаги элчихонаси Рига марказида хочга осиб қўйилган Владимир Путин ҳайкали пайдо бўлганига эътироз билдирган ҳолда Латвия Ички ишлар вазирлигига норозилик нотасини жўнатган.