БААда зиёратчиларни олиб кетаётган автобуснинг ҳалокатга учраши натижасида 3 киши ҳалок бўлди, 56 киши яраланди.
Khaleej Times нашрининг маълум қилишича, ҳалокат Абу Дабидан 200 км нарида содир бўлган. 60 нафар зиёратчини олиб кетаётган автобуснинг ғилдираги ёрилиб кетиши натижасида у тоғ жинсларини майдаловчи машинага урилган. 3 киши воқеа жойида ҳалок бўлган, яна 10 киши оғир аҳволда яқиндаги шифохоналардан бирига ётқизилган.
Абу Даби полицияси вакили полковник Ҳамад Наср ал-Балушийнинг маълумот беришича, ҳалокатга ҳайдовчининг катта тезликда юргани сабаб бўлган. Ҳалокат чоғида унга зарар етмаган, лекин у ҳибсга олинган.
Маълум қилинишича, зиёратчиларнинг барчаси Ҳиндистоннинг Керала штатидан бўлиб, Умрадан қайтаётган бўлган.