17 май куни Тошкентда қрим татарларининг депортация қилинганига 71 йил тўлиши муносабати билан мотам тадбири ўтказилди.

Тадбирда “Авдет” қримтатар миллий маданий маркази, Украинанинг Ўзбекистондаги элчихонаси ва жамоатчилик вакиллари иштирок этди. Тадбир доирасида Тошкентдаги қатағон қурбонлари хотираси ёдгорлик мажмуасига гуллар қўйилди.

Бундан ташқари, Қатағон қурбонлари музейида Ўзбекистон илмий жамоатчилиги, “Авдет” қримтатар миллий маданий маркази ва Украина элчихонаси вакиллари иштирокида давра суҳбати ўтказилди.
Давра суҳбатида чиқиш қилган Украинанинг Ўзбекистондаги элчиси қрим татарларининг миллий фожиаси ҳақида қисқача гапирди. Шунингдек, у Россия қарамоғига ўтган Қрим ярим оролида маҳаллий халқнинг ҳуқуқлари бузилаётганини таъкидлади.

Маълумот учун, 1944 йилнинг 18-21 май кунлари СССР раҳбарияти томонидан Қрим ярим оролида истиқомат қилиб келаётган 200 минг нафар қрим татарлари мажбурий тартибда Ўрта Осиёга депортация қилинган. Йўлда кўчирилаётганларнинг тахминан 40 фоизи очликдан ва касалликлардан ҳалок бўлган. Ҳар йили 18 май куни қрим татарлари депортация қурбонларини ёдга олади. 2014 йилдан буён Украинада 18 май Қрим татарларининг ҳуқуқлари учун курашиш куни сифатида нишонланади.