Италиянинг “Милан” футбол жамоаси вице-президенти Адриано Галлиани келаётган ёзги трансфер пайтида клуб янги ўйинчиларни сотиб олиш учун пулни аямаслигини маълум қилди.

“Ёзда биз шак-шубҳасиз трансфер кампаниясини катта дабдаба билан ўтказамиз.
Сўз “Милан” каби нуфузли клуб ҳақида кетганда, ҳаммасини бошқатдан бошлаш енгил бўлади. Яқинда “Ювентус” бунга ажойиб ўрнак кўрсатди.

1998 йилда жамоамиз чемпионатни 11-ўринда якунланган эди, кейинги мавсумда эса скудеттони (Италия чемпионлигини) қўлга қиритган эдик. Бизда энг юқори чўққига қайтиш учун интилиш бор.

Шунинг учун келаётган трансфер пайтида биз катта истак ва эзгу ниятлар билан ишлаймиз”, деб айтди Галлиани.

“Милан” эгаси Сильвио Берлускони ўзига тегишли клубнинг бир қисм акцияларини осиёлик инвесторларга сотишга яқин турибди.