Россия терма жамоасининг бош мураббийи Фабио Капелло Россиядаги футболнинг ривожланишига нималар тўсқинлик қилаётгани ҳақида фикрлари билан ўртоқлашди.

“Менимча, Россиядаги ҳамкасбларимда кўпинча таркибга ёш, истиқболли ўйинчиларни қўйиш истаги ёки имконияти йўқ. Мана, мисол учун Англияда мен 4 йил ичида терма жамоага 20 ёшгача бўлган 12 нафар футболчини жалб қила олганман. Россияда, афсуски, Премьер-лига жамоаларининг асосий таркибида ўйнайдиган ёш футболчилар деярли йўқ. Бир нарсани тушуна олмайман, нима учун Россиядек катта давлатда етарли миқдорда спорт мактаблари мавжуд эмас. Тушунаман, уларга хизмат кўрсатиш учун футбол тизимида ишлаган катта миқдорда профессионаллар базаси керак. Бунга Краснодардаги футболчиларни тайёрлаш маркази ўрнак бўла олади. Бу шаҳарда мен кўрган дунёдаги энг яхши марказ жойлашган бўлса керак. Унда барча нарса ҳисобга олинган. Тасаввур қилиб кўринг: унда академияда тарбияланувчи ўз фарзандлари билан алоқа қилиб тура олиши учун ота-оналарга мўлжалланган меҳмонхона бор.

Мен Россияда футболчиларни тайёрловчи бундай ажойиб марказ борлигидан фахрланаман. Бироқ бундай марказлар бутун Россия бўйлаб бўлишини, унда эса болалардан яхши футболчиларни тайёрлай оладиган яхши мутахассислар ишлашларини истардим. Бошқа ўрнак бўладиган мисоллар ҳам бор. Мисол учун, Хитойда бошланғич синфларданоқ ўқув дастурига футбол мажбурий ўқитиладиган фан сифатида киритилмоқда. Россияда истеъдодли ёшлар бор. Айни пайтда 17 ёшли ўсмирлар ўртасида 2015 йилги Европа чемпионатининг финал босқичи давом этмоқда, у ерда Россия ўсмирлар жамоаси ҳам тўп сурмоқда. Мана шу ердан миллий терма жамоанинг келажагини излашимиз керак”, деб айтди Капелло.