Ўзбекистон Миллий хавфсизлик хизматининг Давлат чегарасини қўриқлаш қўмитаси матбуот хизмати 19 майда соат 13:45 да Фарғона вилояти, Фарғона тумани Каптархона аҳоли пункти ҳудудида икки нафар қирғизистонликнинг яраланиши ҳолатига изоҳ бериб ўтди.

Давлат чегарасини қўриқлаш қўмитаси матбуот хизмати маълумотларига кўра, Қувасой чегара отрядининг наряди томонидан чегараолди ҳудудида маҳсулот-моддий қимматликлар ортилганлик аломати билан Қирғизистон давлат рақамига эга “Ауди” русумидаги автомобили аниқланган.
“Автомобиль иккита нотаниш йўловчиларни олиб, Қирғизистон томонга йўл олди. Ҳайдовчи тўхташ ҳақидаги қонуний талабларга бўйсунмади. Бундан ташқари, ҳайдовчи транспорт воситасини тўхтатиш учун қурол ишлатишга мажбур бўлган ҳарбий хизматчиларни босиб кетишга уринган. Уларни ушлаш учун амалга оширилган ҳаракатларга қарамасдан, қоидабузарлар Қирғизистон ҳудудига ўтиб кетишган”, дейилмоқда матбуот хизмати берган хабарда.

Бу ҳолат охирги ҳафта ичида содир бўлган учинчи шундай ҳолатдир. Ўзбекистонлик чегарачилар 12 майда Фарғона вилоятининг Сўғ тумани Хушёр қишлоғида республика ҳудудидан 15 тонна қишлоқ хўжалиги маҳсулотларини Қирғизистонга олиб чиқиб кетилиши ҳолатининг олдини олдилар. Қоидабузарларни тўхтатишда юзага келган отишма оқибатида давлат чегарасини бузган Қирғизистон фуқароси, 22 ёшли Махмуджон ўғли Мансур ҳалок бўлган эди. 15 майда эса Сўғ туманининг Чашма аҳоли пункти яқинидаги чегара ҳудудида “Hyundai Porter” автомобили тўхтатилиб текширилганда унинг ичида 1,5 тонна гармдори борлиги аниқланган.