Жанубий Кореядаги Пундан Ча шифохонасининг юрак жарроҳлари ва Junior Chamber International - JCI-Korea халқаро ташкилоти вакилларидан иборат делегация Ўзбекистонга ташриф буюрди. Маълум бўлишича, 12 кишилик ушбу делегациянинг Тошкентга ташрифи JCI-Korea ташкилотининг “Соғлом авлод учун” жамғармаси билан ҳамкорлиги доирасида ташкил этилган.

Кореялик шифокорлар Ўзбекистонда 19-23 май кунлари бўлиб, бир қатор тадбирларда иштирок этади. Жумладан, улар “Соғлом авлод учун” жамғармасида учрашувлар ўтказади, юрак хасталигига чалинган болаларни тиббий кўрикдан ўтказади, Ким Пен Хва номидаги музейга, Ариранг пансионати, Тошкентдаги корейс таълим маркази, Ўзбекистондаги Корея маданий марказлари уюшмаси, Сежонг номли корейс мактаблари ва Корея элчихонасига ташриф буюради. Бундан ташқари, улар лойиҳа доирасида жарроҳлик амалиётидан ўтган болалар билан учрашади.

20 май куни кореялик жарроҳлар хаста болаларни тиббий кўрикдан ўтказади. Кейинчалик ёш беморлардан баъзи бировлари Кореяга олиб кетилиб, JCI-Korea ташкилотининг молиявий кўмагида Ча университети қошидаги Пундан Ча шифохонасида даволанади ёки жарроҳлик амалиётидан ўтказилади.