АҚШ Ҳарбий-денгиз кучлари “Цикада” номли янги ихчам разведка дронларини яратиш бўйича ишлар олиб бормоқда. Лойиҳа 2006 йилда бошланган. 2011 йилда ихчам автоном учиш аппаратларининг илк синов парвозлари амалга оширилган эди. Инсон кафтига сиғиши мумкин бўлган янги дронлар ўтган ҳафтада АҚШ Мудофаа вазирлиги томонидан ўтказилган Lab Day тадбирида намойиш қилинди.

Endgadet портали хабар беришича, бу миттивойлар худди кичкина қоғоз самолётчаларга ўхшаб кетади ҳамда уларда двигатель йўқлиги сабабли умуман шовқинсиз учади. Уларга “Цикада” (ҳашарот тури) деган ном бежиз танланмаган. Янги дронлар цикадаларга ўхшаб гала бўлиб ишлаш учун мўлжалланган. Ўзининг кичик ўлчамига қарамасдан, улар батареялар ҳамда турли сенсорлар билан жиҳозланади.

2011 йилда чиққан дрон об-ҳаво, ҳарорат ва намликни ўлчаш сенсорлари билан жиҳозланган эди. Ўтган ҳафтада намойиш қилинган дроннинг янги версияси микрофон, тебраниш датчиклари билан жиҳозланиши мумкин ва бунинг эвазига дрон душманни тинглаши ёки душманнинг техникасини аниқлаб, унинг ҳужум йўналишини кўрсата оладиган идеал шовқинсиз радведкачига айланиши мумкин.

“Цикада”ларда двигателлар ёки қандайдир ҳаво винтлари мавжуд эмас, бироқ улар самолётдан ёки ҳаво шаридан маълум жойда ҳавога ташлангандан кейин 74 километргача узоқликка уча олади. Ҳар бир дроннинг тизимига GPS координаталари юкланади ва улар ерга қўнаётганда шу координаталарга амал қилади.

Янги дроннинг прототипини ишлаб чиқиш АҚШ ҲҲКга анчагина катта пулга тушди, бироқ муҳандислар дронлар оммавий тарзда ишлаб чиқарилганда ҳар бир дроннинг нархи 250 доллар бўлиши ва бу ҳарбий дронлар учун унча катта қийматни ташкил этмаслиги айтмоқдалар.

Дронларнинг шовқинсизлиги, юқори самарадорлиги ва паст нархи туфайли у билан нафақат ҳарбий тузилмалар, балки баъзи разведка хизматлари ҳам қизиқиб қолди.