Бугун Бахтиёр Ашурматов бошчилигидаги Ўзбекистон U23 терма жамоаси тақдири ҳал бўлади.

Хабарингиз бор, олимпиячиларимиз ўз гуруҳларида иккинчи ўринни эгаллаб, келаси йили Қатарда бўладиган Осиё чемпионати йўлланмасига тўғридан-тўғри йўлланмага эгалик қилиша олмаганди. Эндиликда Ашурматов шогирдлари бугун бўлиб ўтадиган "В" гуруҳининг сўнгги ўйинлари натижасини пойлашга мажбурлар.

Бугун ушбу гуруҳда Иордания - Кувайт ва Покистон - Қирғизистон термалари ўзаро куч синашиб, гуруҳ ўйинларига якун ясаб беришади. Иордания иккита ўйинда иккита ғалабага эришиб, ОЧ йўлланмасини ўзи учун ижобий ҳал қилиб бўлди. Кувайт эса биринчи турда Қирғизистон билан дуранг ўйнаб, иккинчи турда Покистонни 2:0 ҳисобида мағлуб этган.

Қисқа қилиб тушунтирадиган бўлсак, биз Осиё Чемпионатига йўлланма олишимиз учун бугун Иордания Кувайтни енгиши керак ёки дуранг ўйнаши лозим. Акс ҳолда, Ўзбекистон U23 термаси гуруҳда қолиб кетади.

Эслатиб ўтамиз, ўтган йилги мавсум якунларига бағишланган тадбирда ЎФФ президенти Мираброр Усмонов агар Рио-2016 Олимпиадаси йўлланмаси ижобий ҳал қилинмаса, Ўзбекистон U23 термаси бош мураббийи, ТЖМ директори Асқар Толибжонов ва ТЖМ Техник директори Рустам Акрамовлар ўз лавозимидан четлатилиши ҳақида айтиб ўтганди.

Манба: uff.uz