Франция, Германия ва Италия мудофаа вазирлари ҳамкорликда Европа учувчисиз самолётини яратиш бўйича шартнома имзолади. Учиш аппарати 2025 йилга қадар яратилиши айтилмоқда.
18 май куни имзоланган келишувга кўра, тадқиқот ишларига 1 млрд евро ажратилади. Дрон ўрта баландликда учиши, узоқ масофаларга мўлжалланиши, ҳарбий ва фуқаролик мақсадларида қўлланилиши керак. Маълумот учун, бугунги кунда мавжуд дронлар 24 соат давомида 9 км баландликда туришга қодир.

Разведка ва кузатув ишларидан ташқари, янги самолёт табиий офатлар, ёнғинлар ва чегара ҳудудларини назорат қилиш сингари функцияларни бажаради.
Франция мудофаа вазири Жан-Ив Ле Дриан ушбу шартнома уч давлат ўртасидаги ҳарбий ҳамкорликни янги босқичга олиб чиқишини таъкидлаб ўтди.

Европа Иттифоқи кўпдан буён ўз учувчисиз самолётига эга бўлишни режалаштириб келади. Айни пайтда Иттифоқ давлатлари АҚШ ва Исроил ҳарбий ҳаво техникасидан фойдаланади.
“Евро-дрон” лойиҳасидан кўзланган мақсад қачон нима қилишни европаликларнинг ўз ихтиёрига қўйиб беришдир. Бу бизларни, европаликларни, мустақил қилади”, – таъкидлаб ўтди Германия мудофаа вазири Урсула фон дер Лайен.

Дронни ишлаб чиқариш Airbus, Alenia Aermacchi ва Dassault экрокосмик компанияларидан бирига ишониб топширилиши тахмин қилинмоқда.