Ганновер шаҳрининг 31 мингга яқин аҳолиси шаҳар ҳудудида Иккинчи жаҳон уруши замонидаги бомба борлиги аниқлангани туфайли бир кечада ўз уйларидан эвакуация қилинади.

Маҳаллий полициянинг хабар беришича, бомба ушбу шаҳарнинг жанубий қисмида қурилиш ишлари олиб борилаётган жойда топилди. Унинг оғирлиги 250 килограммни ташкил қилмоқда. Сапёрлар бомба детонаторини олиб ташлашга уриниб кўришади, агар буни амалга оширишнинг иложи бўлмаса, унда бомба бошқарилувчи портлаш билан йўқ қилинади.

“Маҳаллий аҳоли учун ҳеч қандай хавф йўқ. Одамлар вақтинчалик шифохона ва мактабларга жойлаштирилади. Бомба зарарсизлантирилгандан кейин улар ўз уйларига қайтишлари мумкин бўлади”, деб айтмоқда полиция вакили.

Иккинчи жаҳон уруши охирида Германия ҳудудига 2 млн донадан ортиқ бомба ташланган. Улардан 20 фоиздан кўпроғи портламай қолиб кетган.