Тошкент, Фарғона ва Андижон шаҳарларида кўча цирки санъати намойиш этилади. Ушбу лойиҳа Елисей келишуви доирасида “Ўзбекцирк” Республика бирлашмаси кўмаги остида Германия Федератив Республикаси элчихонаси, Франция Республикаси элчихонаси ва Тошкентдаги Гёте-институти каби ташкилотлар томонидан ташкил этилмоқда.

Лойиҳада франциялик, германиялик ҳамда Тошкент цирки артистлари иштирок этишади. Томошабинларга акробатлар, дарбозлар ва бошқа артистлар иштирокидаги очиқ осмон остидаги турли хил томошалар дастури тақдим этилади.

Лойиҳа орқали турли хилдаги трюклар, овозлар, кайфиятлар, бадиий ва миллий кўринишлар орқали ажойиб кўча цирк санъати намойиш этилади.

Беш кунлик биргаликдаги машғулотлардан кейин артистлар томошабинлар эътиборига ўзларининг маҳоратларини намойиш этадилар. Тошкентда 21 май соат 18:00 да Ўзбекцирк биносида ёнида “SIRK.UZ” номли катта томоша бўлиб ўтади. Сўнгра томошалар 23 май соат 18:00 да Фарғона шаҳри Қирғули қишлоғиининг Кимёгар” маданият ва истироҳат боғида ҳамда 24 май соат 18:00 да Андижон шаҳридаги Алишер Навоий номидаги маданият ва истироҳат боғида намойиш этилади.

Бундан ташқари, лойиҳа доирасида германиялик ва франциялик артистлар Тошкентдаги Республика эстрада-цирк коллежи ўқувчилари учун цирк санъатидан мастер-класслар ўтказишади.

2003 йилда Елисей келишуви имзоланганининг 40 йиллиги муносабати билан Германия ва Франция ўртасидаги дўстликни янада мустаҳкамлаш мақсадида учинчи давлатларда маданий лойиҳаларни қўллаб-қувватлаш жамғармаси ташкил этилган эди. Ўзбекистонда ўтказиладиган бу дастур француз-немис дўстлигининг амалдаги исботини намойиш қилади.