Ўзбекистон аҳолисининг 50.1 фоизи ортиқча вазнга эга. 20.1 фоиз аҳоли эса ёғ боғлашдан келиб чиқадиган касалликлар ва ноқулайликлардан азият чекади, деб хабар берди "Газета.Уз". Бу ҳақда “Юқумсиз касалликларнинг тарқалиш омиллари” номли биринчи кенг миқёсли миллий тадқиқотдан маълум бўлди.

Тадқиқот якунлари сешанба куни Тошкентда кенг жамоатчиликка тақдим этилди. Айтилишича, сўровнома ва тадқиқот ишлари 2014 йил январь-апрель ойларида соғлиқни сақлаш вазирлиги томонидан Жаҳон банкининг “Соғлиқ-3” лойиҳаси доирасида амалга оширилган. Умуман олганда, тадқиқот натижаларини тайёрлаш, таҳлил қилиш ва қайта ишлаш жараёнига 3 йил сарфланган.

Тадқиқот кластер усулида ўтказилган бўлиб, унинг доирасидаги изланишларда 18-64 ёш орасидаги 4 350 киши иштирок этди. У уч босқичда ўтказилди: сўровнома, жисмоний ва биокимёвий текширув.
Аниқланишича, 67.2 фоиз аҳоли ҳар етарли миқдорда мева ва сабзавот истеъмол қилмайди (400 гр дан кам). Сўровномада иштирок этганларнинг 46.3 фоизининг қони таркибида холестерин миқдори меъёридан ортиқ.
30.8 фоиз аҳолида қон босими юқори, 9.1 фоиз аҳолининг қонида эса глюкоза ортиб кетган.

Шунингдек, аҳолининг 30.7 фоизи спиртли ичимликлар ва 42.4 фоизи тамаки маҳсулотларини истеъмол қилиши аниқланди. Аёллар ичида бу кўрсаткичлар анча паст – 5.7 ва 1.5 фоиз.

40-64 ёш орасидаги аҳолининг 20 фоизи юрак касаллигига чалиниш хавфи остида эканлиги айниқса мутахассисларни хавотирга солмоқда.
Фақатгина 11 фоиз аҳоли ҳеч қандай хавф омилига эга эмас. 66.4 фоиз аҳоли 1-2та хавф омилига, 22.6 фоиз аҳоли 3-5 омилга эга.